Qobustan Qapalı Cəzaçəkmə Müəssisəsinin rəisi Aftandil Ağayev ömürlük cəzaya məhkum olunan Namiq Vəliyevi döydürərək, ona işgəncə verib.
Bu barədə Gununsesi.info-ya Namiq Vəliyevin ailəsindən bildirilib. Məlumatda 21 ildir ki, cəza çəkən Namiq Vəliyevin rəisin göstərişi ilə döyüldükdən sonra karsa salındığı bildirilir. Ona 10 sutka cərimə təcridxanası verilib.
Buna səbəb isə həmin müəssisədə qidalanma və digər məsələlərlə bağlı oradakı məhkumların İnsan Hüquqları Üzrə Müvəkkilə (Ombudsman) Elmira Süleymanovaya şikayətləri olub.
****
Penitensiar Xidmətin mətbuat xidmətinin rəhbəri Mehman Sadıqov Gununsesi.info-ya açıqlamasında bildirib ki, Qobustan Qapalı Cəzaçəkmə Müəssisəsində ömürlük həbs cəzası çəkən məhbusla bağlı yayılan informasiya həqiqəti əks etdirmir:
“Namiq Vəliyevin ailəsinin bütün bunları mətbuata hansı məqsədlərlə dediyini bilmirəm, lakin belə şeylər qətiyyən ola bilməz. Çünki Qobustan Qapalı Cəzaçəkmə Müəssisəsində saxlanılan şəxslərin hamısı nəinki Ombudsmana, eləcə də, Avropa Şurasına, Avropa Məhkəməsinə, və digər instansiyalara mütəmadi olaraq şikayət məktubları göndərirlər. İndiyədək də bu şikayət məktublarının heç biri saxlanılmayıb. Qobustan Qapalı Cəzaçəkmə Müəssisəsində saxlanılan bəzi məhkumların işlərinə Avropa Məhkəməsində də baxılıb. Bu onu sübut edir ki, biz – Azərbaycan dövləti, Ədliyyə Nazirliyi, Penitensiar Xidməti həmin məktubları, eləcə də məhbusların hər hansı şikayətləri varsa, heç vaxt onun qarşısını almırıq. Ona görə də əksinə, qanunauyğun olaraq, 24 saat ərzində həmin şikayət məktublarını aidiyyatı orqanlara və instansiyalara göndəririk. Ona görə də, Qobustan Qapalı Cəzaçəkmə Müəssisəsinin rəisi Aftandil Ağayevin ömürlük cəzaya məhkum olunan Namiq Vəliyevi Ombudsmana şikayət etdiyinə görə, döydürüb işgəncə verdirməsiylə bağlı söylənilənlər absurd fikirlərdir”-, deyə o bildirib.
Gununsesi.info
