Görkəmli yazıçı, publisist Çingiz Hüseynovun vəfatı Azərbaycan ictimaiyətində dərin kədərlə qarşılanıb.
Ölkənin ayrı-ayrı ziyalılarının, ictimai-siyasi dairələrin təmsilçilərinin, ədəbiyyat və mədəniyyət adamlarının sosial şəbəkələrdə yazdıqları da bunu deməyə əsas verir.
Çingiz Hüseynovun hökumətin tənqidçisi olması səbəbindən dövlət mediası və hökumətə yaxın şəxslər böyük yazıçının itkisi haqqında susdular.
Bununla belə Diasporla İş üzrə Dövlət Komitəsi Çingiz Hüseynov haqqında nekroloq yayıb.
Qurumdan Gununsesi.info-ya göndərilən nekroloqda deyilir:
Görkəmli Azərbaycan yazıçısı, Azərbaycan diasporunun tanınmış nümayəndələrindən biri Çingiz Hüseynov ömrünün 94-cü ilində dünyasını dəyişib.
Çingiz Hüseynov 1929-cu il aprelin 20-də Bakıda anadan olub. Nasir, tənqidçi, ədəbiyyatşünas, tənqidçi və tərcüməçi kimi fəaliyyət göstərən görkəmli yazıçı Lomonosov adına Moskva Dövlət Universitetininin filologiya fakültəsini bitirib. 1959-cu ildən Azərbaycan Yazıçılar Birliyinin üzvü, filologiya elmləri doktoru (1979), professor (1980), əməkdar incəsənət xadimi Çingiz Hüseynov əsərlərini iki dildə – Azərbaycan və rus dillərində yazıb.
Qeyd edək ki, XX əsr Azərbaycan bədii fikrinin aparıcı simalarından olan Çingiz Hüseynov uzun illərdir İsraildə yaşayırdı.
Diasporla İş üzrə Dövlət Komitəsi bu ağır itkidən kədərləndiyini bildirir, mərhumun ailə üzvlərinə və oxucularına dərin hüznlə başsağlığı verir.
Gununsesi.info
