Dövlət İmtahan Mərkəzinin (DİM) mayın 7-də ali təhsil müəssisələrinə I və IV ixtisas qrupları üzrə keçirdiyi qəbul imtahanında 7 abituriyent 700 bal toplayıb. Rekorda imza atan abituriyentlərdən biri də 287 nömrəli “Zəkalar” liseyinin 11-ci sinif şagirdi Nemət Yusifovdur.
Gununsesi.info xəbər verir ki, Nemət Yusifov “Virtualaz.org”un suallarını cavablandırıb:
– İmtahana necə hazırlaşırdınız?
– Xüsusi sistemim yox idi. Vaxtımdan səmərəli istifadə edərək hazırlaşırdım.
– Bəs əslində neçə bal gözləyirdiniz? 700 bal toplayacağınıza inanırdınızmı?
– Təbii ki, yüksək nəticə əldə edəcəyimə inanırdım, lakin 700 haqqında heç düşünməmişdim.
– May ayının sonunda keçiriləcək sınağa, yəqin ki, bilet almısınız. İştirak etməyi düşünürsünüz?
– Məncə, sınaqlara bu baldan sonra ehtiyac yoxdur.
– Bəs iyul ayında keçiriləcək ikinci imtahana gedəcəksiniz?
– İnsanda şans bir dəfə olur, nəticəmi korlamamaq üçün getməyəcəyəm.
– Sizcə, qəbul imtahanına hazırlaşmaq üçün yalnız məktəbdə qazanılan biliklər kifayət edir?
– Mümkünsüz heç nə yoxdur, amma repetitorsuz çox çətin olardı.
– Hansı ixtisasa yiyələnmək istəyirsiniz və nə üçün?
– Həkimlik, çünki bu işi bacaracağıma inanıram.
– Gələcəyin həkimi kimi, ölkənin səhiyyə sistemində hansı dəyişikliyi etmək istərdiniz?
– Yəqin ki, həkimlərin insanlara yanaşma tərzini dəyişərdim.
Gununsesi.info
