Rusiya Federal Təhlükəsizlik Xidməti (FTX) cümə günü Moskva yaxınlığındakı konsert zalında silahlıların atışma nəticəsində 40 nəfərin öldüyü, 100-dən çox adamın yaralandığını açıqlayıb.
Gununsesi.info xəbər verir ki, FTX çoxlu silahlı şəxslərin Moskva vilayətinə bitişik ərazidəki binaya hücumundan sonra bildirib. “İlkin məlumatlara görə, “Crocus City Hall” kompleksində törədilən terror aktı nəticəsində 40 nəfər ölüb, 100-dən çox insan yaralanıb”, – FTX bildirib.
Hadisə Moskva vilayətinin inzibati mərkəzi Krasnoqorskda, ilkin məlumata görə, “Piknik” musiqi qrupunun “Crocus City Hall”da çıxış etdiyi yerdə baş verib. Hüquq-mühafizə orqanlarının məlumatına görə, onlar hücum zamanı xəsarət almayıblar.
Daha sonra böyük yanğına səbəb olan yerdə partlayış olduğu da bildirilir. Ölkənin Fövqəladə Hallar Nazirliyi binanın təxminən üçdə birinin alov içində qaldığını, bir neçə helikopterin yanğını söndürmək üçün çalışdığını bildirib.
Rusiya Baş Prokurorluğu naməlum şəxslərin konsert başlamazdan əvvəl atəş açdığını, hadisədən sonra istintaq komitəsinin cinayət işi açdığını bildirib.
Atıcıların taleyi hələ də naməlum olaraq qalır, bəzi məlumatlarda onların hadisə yerindən qaçmağa müvəffəq olduqları iddia edilir.
Nazirlik əlavə edib ki, indiyədək binadan 100-dən çox insan təxliyə edilib, daha çox insan damda kömək gözləyir.
Rusiyanın Səhiyyə Nazirliyi bildirib ki, 50-dən çox təcili tibbi yardım maşınının toplandığı hadisə yerinə Moskvanın xüsusi təyinatlıları, polis və yanğınsöndürənlər gəlib.
Moskva vilayətinin qubernatoru Andrey Vorobyov vəziyyəti həll etmək üçün işçi qrupunun yaradılacağını açıqlayıb.
Moskva meri Sergey Sobyanin hücumda həlak olanların və yaralananların yaxınlarına başsağlığı verib.
“Bu gün “Crocus City Hall”da dəhşətli faciə baş verib. Ölənlərin yaxınlarına başsağlığı verirəm. Hadisə zamanı yaralananların hamısına lazımi köməklik göstərilməsinə göstəriş vermişəm”, – o deyib.
Sobyanin həmçinin həftə sonu Moskvada bütün əyləncə tədbirlərinin ləğv edildiyini açıqlayıb.
Gununsesi.info
