“Bakı çox gözəl şəhər, buranın sakinləri modern, səmimi və maraqlı insanlardır”.
Bu sözləri amerikalı müğənni, 47 yaşlı Merayya Keri Bakıdakı konsertindən sonra deyib.
M.Keri beynəlxalq “Formula-1” avtoçempionatının Azərbaycan Qran-Prisinin əsas yarışı başa çatandan sonra Bakıda, “Formula-1” şəhərciyində konsert vermişdi.
5 oktavalı vokal diapazona məxsus amerikalı müğənni Bakıya 6 yaşlı əkiz övladlarını – Monro və Marokkonu da gətirmişdi.
Dünən əsas yarış başlamazdan əvvəl M.Kerri “Red Bull Racing” komandasının pilotları, avstraliyalı Deniel Rikkiardo və hollandiyalı Maks Verstappenlə görüşüb.
Bu arada Sky Sports-un reportyoru Martin Brandl müsahibə almaq üçün müğənniyə yaxınlaşsa da, M.Kerri rədd cavabı verib.
Aparıcı müğənnidən açıqlama almaq istəsə də, niyyəti puç olub. Pərt olmuş aparıcı efirdə deyib: “Hə, nə etməli, bu, mənim həyatımı korlayan əhvalat deyil. Ümid edirəm ki, sizə də pis təsir etməz. Ondan bir-iki suala cavab almaq istəyirdim. İndiyədək Merayya ilə görüşməsəm də, onun mahnılarını sevirəm. Amma nə etməli, gəlin başqa musiqiyə qulaq asaq. Himni dinləyək”.
Daha sonra M.Keri “Mercedes AMG Petronas” komandasının pilotu Lüis Hemiltonla söhbətləşib.
Gununsesi.info
