Tanınmış alim, Azərbaycan Milli Elmlər Akademiyasının (AMEA) həqiqi üzvü, kimya elmləri doktoru, professor, əməkdar elm xadimi Rəfiqə Əliyeva ilə vida mərasimi keçirilir.
Gununsesi.info-nun xəbərinə görə, AMEA-nın dairəvi zalında keçirilən vida mərasimində Prezident Administrasiyasının rəhbəri Ramiz Mehdiyev, nazirlər, alimlər, mərhumun ailə üzvləri, ictimaiyyət nümayəndələri və digər şəxslər iştirak edir.
Qeyd edək ki, Rəfiqə Əlirza qızı Əliyeva mayın 6-da ömrünün 85-ci ilində vəfat edib.
Rəfiqə Əliyeva 1932-ci il sentyabrın 20-də Naxçıvan şəhərində anadan olmuşdur. O, orta məktəbi bitirdikdən sonra ali təhsilini 1951–1956-cı illərdə Azərbaycan Dövlət Universitetinin kimya fakültəsində alıb.
Əmək fəaliyyətinə 1956-cı ildə Azərbaycan Politexnik İnstitutunda başlayan Rəfiqə Əliyeva 1957-ci ildən etibarən Azərbaycan Dövlət Universitetində, 1958–1960-cı illərdə isə Azərbaycan Elmlər Akademiyasının Kimya Problemləri İnstitutunda kiçik elmi işçi kimi çalışıb. 1960–1963-cü illərdə Azərbaycan Dövlət Universitetinin kimya fakültəsinin aspiranturasında təhsil alan Rəfiqə Əliyeva 1964-cü ildən ömrünün sonuna qədər universitetin analitik kimya kafedrasında işləmiş və burada assistent, baş müəllim, dosent, professor vəzifələrini tutub. O, 2001 ci ildən “Ekoloji kimya və ətraf mühitin mühafizəsi” elmi-tədqiqat laboratoriyasına rəhbərlik edib.
Rəfiqə Əliyeva 1970-ci ildə namizədlik, 1999-cu ildə doktorluq dissertasiyalarını müdafiə edib və həmin ildə professor adına layiq görülüb. 2007-ci ildə Azərbaycan Milli Elmlər Akademiyasının müxbir üzvü, 2014-cü ildə isə həqiqi üzvü seçilib.
Ömrünü kimya elminə həsr etmiş Rəfiqə Əliyeva bu sahədə yüksək ixtisaslı kadrların hazırlanmasına bütün bilik və bacarığını sərf edib. Yarım əsrdən artıq pedaqoji fəaliyyətlə məşğul olan alimin araşdırmaları analitik reaksiyaları xarakterizə edən parametrlərlə kompleks birləşmələrin quruluşu arasındakı asılılığın müəyyən edilməsinə həsr olunub. Rəfiqə xanımın ətraf mühitin mühafizəsi ilə bilavasitə bağlı olan bir sıra tədqiqatları, eyni zamanda, üzvi reaktivlərin köməyi ilə metalların təyini və onların ayrılması metodikasının işlənib hazırlanmasına yönəlib. Ekologiyanın aktual problemləri ilə bağlı işləri isə ölkəmizin davamlı inkişafının təmin olunmasına öz töhfəsini verib.
450-dən artıq elmi əsərin, 25 dərslik və dərs vəsaitinin, 20 patentin müəllifi olan Rəfiqə Əliyeva bir sıra elmi şuraların və cəmiyyətlərin üzvü olub. Alimin rəhbərliyi altında 20-dən çox fəlsəfə və elmlər doktorları yetişdirilib.
Tanınmış kimyaçı alim Rəfiqə Əliyevanın məhsuldar elmi-pedaqoji fəaliyyəti yüksək qiymətləndirilib. O, Azərbaycanda təhsilin və elmin inkişafındakı xidmətlərinə görə müstəqil Azərbaycan Respublikasının ali mükafatı – “Şöhrət” ordeni ilə təltif edilib.
Qeyd edək ki, Rəfiqə Əliyeva Azərbaycan prezidenti İlham Əliyevin bibisidir.
***
Prezident İlham Əliyev və birinci xanım Mehriban Əliyeva mərhumun ailə üzvlərinə dərin hüznlə başsağlığı verdilər.
AMEA-nın prezidenti, akademik Akif Əlizadə görkəmli alim Rəfiqə Əliyevanın səmərəli elmi fəaliyyətindən, respublikamızda kimya elminin inkişafına verdiyi töhfələrdən danışdı. Bildirdi ki, Rəfiqə Əliyeva Azərbaycan elmində özünəməxsus yeri olan alim idi. Onun rəhbərliyi altında çox önəmli elmi tədqiqat işləri aparılıb. 450-dən artıq elmi əsərin, 25 dərslik və dərs vəsaitinin, 20 patentin müəllifi olan Rəfiqə Əliyeva bir sıra elmi şuraların və cəmiyyətlərin üzvü olub. Alimin rəhbərliyi altında 20-dən çox fəlsəfə və elmlər doktorları yetişdirilib.
Akif Əlizadə vurğuladı ki, ömrünün böyük hissəsini Bakı Dövlət Universiteti ilə bağlayan Rəfiqə Əliyeva elmlə təhsilin vəhdətini yaradıb, Azərbaycan elminin kimya istiqamətində özünəməxsus iz qoyub. Rəfiqə Əliyevanın fəaliyyətində kimyanın inkişafı ilə ətraf mühitin qorunmasının mühüm istiqamət olduğunu deyən Akif Əlizadə onun gözəl insan, gözəl ana kimi də keyfiyyətlərini vurğuladı.
Bakı Dövlət Universitetinin rektoru, akademik Abel Məhərrəmov ömrünün böyük hissəsini Bakı Dövlət Universitetində ixtisaslı kadrların hazırlanmasına sərf edən Rəfiqə xanımın pedaqoq kimi xidmətlərindən danışdı, onun gözəl müəllim olduğunu dedi. Abel Məhərrəmov ölkəmizdə çoxsaylı kimyaçılar nəslinin yetişməsində müstəsna xidmətləri olan Rəfiqə Əliyevanın hər zaman tələbələrin sevimlisinə çevrildiyini, onun öz tələbələrinə daim ana qayğısı ilə yanaşdığını diqqətə çatdırdı. Universitetdə bir çox elmi tədqiqatların aparılmasında, kimya üzrə laboratoriyanın yaradılmasında birbaşa rol oynayan Rəfiqə Əliyevanın ictimaiyyət arasında da böyük hörmətə sahib olduğunu deyən rektor mərdlik, cəsarət, iradə kimi xüsusiyyətlərə sahib olan alimin elmi irsinin qorunacağını, xatirəsinin əbədiləşdiriləcəyini bildirdi, onun adının elm, təhsil, maarifçilik tarixinə qəzıl hərflərlə yazıldığını vurğuladı.
AMEA-nın vitse-prezidenti, akademik Dilqəm Tağıyev də Rəfiqə Əliyevanın elmi fəaliyyətinə nəzər saldı, onun ölkəmizdə kimya elminin inkişafındakı xidmətlərini xatırladı. Bildirdi ki, analitik kimya sahəsində mühüm fəaliyyəti ilə seçilən Rəfiqə Əliyeva 1960-cı illərdən başlayaraq bu sahədə çox dəyərli tədqiqatlar aparıb. Təsadüfi deyil ki, Rəfiqə xanım analitik kimya sahəsində AMEA-nın yeganə həqiqi üzvü olub. Alimin insani keyfiyyətlərini, xeyirxah əməllərini xatırlayan Dilqəm Tağıyev onun xatirəsinin gələcək nəsillərin qəlbində daim yaşayacağını bildirdi.
AMEA-nın Aşqarlar Kimyası İnstitutunun direktoru, akademik Vaqif Fərzəliyev qeyd etdi ki, ziyalıların, alimlərin vəfatı xalq üçün hər zaman böyük itki sayılır. Ömrünü və fəaliyyətini Bakı Dövlət Universiteti ilə bağlamasına baxmayaraq, Rəfiqə xanımın hər zaman akademiya ilə əlaqəli olduğunu deyən Vaqif Fərzəliyev onun Azərbaycan elmində xüsusi rolu ilə diqqət çəkdiyini bildirdi. Qeyd etdi ki, Rəfiqə xanımın işığı hər zaman tələbələrinin, övladlarının üstündə olacaq və onları daim xalqa xidmətə ruhlandıracaq.
AMEA-nın vitse-prezidenti, akademik İsa Həbibbəyli Azərbaycan elminə özünəməxsus töhfələr verən elm xadimi Rəfiqə Əliyevanın alim, pedaqoq adını hər zaman uca tutduğunu dedi. Bildirdi ki, Azərbaycan ziyalılığının mükəmməl mücəssəməsi olan Rəfiqə Əliyeva ölkəmizin ictimai-siyasi həyatında, elmi-maarifçi mühitində fəal olub. Azərbaycanın tarixi taleyində böyük rol oynayan şəcərənin görkəmli nümayəndəsi olan Rəfiqə Əliyevanın sadəliyini, insani xüsusiyyətlərini vurğulayan İsa Həbibbəyli onun əziz xatirəsinin elmin yeni simalarının da qəlbində daim yaşayacağını bildirdi.
Mərhumun ailəsi adından çıxış edən qızı Fəxriyyə Xələfova Rəfiqə Əliyevanın insani keyfiyyətlərindən danışdı. “Rəfiqə xanım gözəl ana olmaqla yanaşı, bizim həyatımızın əsas müəllimi idi”, – deyən Fəxriyyə Xələfova onun ana, həyat yoldaşı və nənə kimi əvəzolunmaz olduğunu bildirdi. Qeyd etdi ki, Rəfiqə xanımın yetişdirdiyi böyük alim ordusu bu gün elmin keşiyində ləyaqətlə durur və bu da deməyə əsas verir ki, onun irsi davam etdiriləcək. Fəxriyyə Xələfova əminliyini bildirdi ki, Rəfiqə xanımın xatirəsi hər zaman insanların qəlbində yaşayacaq.
Sonra tanınmış alimin cənazəsi son mənzilə yola salındı.
Mərhumun ailə üzvləri və doğmaları onunla vidalaşdılar.
Görkəmli alim, akademik Rəfiqə Əliyeva birinci Fəxri xiyabanda torpağa tapşırıldı.
Dəfn mərasimində Azərbaycan Prezidenti İlham Əliyev, birinci xanım Mehriban Əliyeva və ailə üzvləri də iştirak etdilər.
Respublikanın tanınmış kimyaçı alimi, Milli Elmlər Akademiyasının həqiqi üzvü, kimya elmləri doktoru, professor, Əməkdar Elm Xadimi Rəfiqə Əliyevanın vəfatı Azərbaycanın elmi ictimaiyyətinə ağır itkidir. Böyük pedaqoji fəaliyyəti ilə seçilən, ölkəmizdə çoxsaylı elmi kadrların yetişməsində əvəzsiz rolu olan Rəfiqə Əliyevanın araşdırmaları kimya elmi üçün mühüm əhəmiyyət kəsb edir. Ölkəmizdə təhsilin və elmin inkişafındakı xidmətlərinə görə müstəqil Azərbaycan Respublikasının ali mükafatı – “Şöhrət” ordeni ilə təltif edilmiş tanınmış pedaqoq və alim Rəfiqə Əliyevanın xatirəsi onu tanıyanların qəlbində həmişə yaşayacaq.
Allah rəhmət eləsin!
Gununsesi.info
