Rusiyadakı opponentlər prezident seçkilərinin son günü “Putin əleyhinə günorta” adlı dinc simvolik aksiyada bir araya gəlib.
Gununsesi.info xəbər verir ki, prezident seçkilərinin son günündə müxalifətçilər siyasi etiraz olaraq günorta saatlarında səsvermə mərkəzlərinə axışıblar.
“Putinə qarşı günorta” adlı dinc simvolik aksiyada opponentlər ölkənin hər yerindəki seçki məntəqələrinə gedərək böyük fərqlə qalib gələcəyi gözlənilən Putinə qarşı mübarizə aparan üç namizəddən birinə səs veriblər.
Bəzi opponentlər seçki bülletenlərinə keçən ay Arktika həbsxanasında ölən Aleksey Navalnının adını yazıblar.
Navalnı ölümündən əvvəl vəkilləri vasitəsilə sosial şəbəkədə paylaşdığı mesajda “Putinə yox” planını dəstəkləyib.
Müstəqil “Novaya qazeta” qəzeti aksiyanı “Navalnının siyasi vəsiyyəti” kimi qiymətləndirib.
“Aksiya öz məqsədlərinə çatdı. Aksiya göstərdi ki, başqa bir Rusiya var, Putinə qarşı duran insanlar var”, – Navalnının Korrupsiyaya Qarşı Mübarizə Fondunun rəhbəri İvan Jdanov YouTube-da yayımlanan proqramda bildirib.
Navalnının digər müttəfiqi Leonid Volkov qeyd edib ki, aksiyanın məqsədi Putinə qarşı olanları birləşdirməyə və təşviq etməkdir.
Keçən həftə Vilnüsdə çəkiclə hücuma məruz qalan Volkov Moskva, Sankt-Peterburq, Yekaterinburq və digər şəhərlərdə yüz minlərlə insanın seçkilərə getdiyini bildirib.
Namizədliyi seçki rəsmiləri tərəfindən əngəllənən liberal siyasətçi Boris Nadejdin ümid etdiyini bildirib ki, bir çox rusiyalı Putinin əleyhinə səs verəcək.
“İnanıram ki, Rusiya xalqının bu gün baş verənlərə öz həqiqi münasibətini Putinə deyil, digər namizədlərə və ya başqa bir şəkildə səs verməklə göstərmək şansı var və mən məhz bunu edirəm”, – Nadejdin səsvermədən sonra deyib.
Seçicilərdən biri “Reuters” agentliyinə deyib: “Ümid azdır, amma belə bir şey edə bilirsənsə, etməlisən. Demokratiyadan heç nə qalmayıb”. Kimliyi gizlədilən başqa bir gənc qadın Putinə qarşı mübarizə aparan üç namizəddən “ən az şübhəli”yə səs verdiyini deyib.
Kreml Navalnının əksəriyyəti Rusiyadan kənarda yaşayan siyasi müttəfiqlərini Qərb adından ölkədə sabitliyi pozmağa çalışan təhlükəli ekstremistlər adlandırır.
Avstraliya, Yaponiya, Ermənistan, Qazaxıstan, Almaniya və İngiltərə kimi bir çox ölkədəki Rusiyanın diplomatik nümayəndəliklərində qurulan seçki qutularında günorta saatlarında yüzlərlə rusiyalı növbəyə düzülüb.
Navalnının həyat yoldaşı Yuliya Navalnaya Berlində keçirilən etiraz aksiyasında iştirak etmək üçün Navalnının mətbuat katibi Kira Yarmışla birlikdə Rusiya səfirliyinə gəlib.
Səfirlikdəki növbəyə qoşulan Navalnaya alqışlarla qarşılanıb.
Londonda minlərlə insan səssizcə Rusiya səfirliyi qarşısında növbəyə durub.
25 ildir hakimiyyətdə olan 71 yaşlı Vladimir Putin Kremlə dost partiyalardan olan üç rəqibi ilə qarşılaşıb.
Bunlar Liberal Demokrat Partiyasının sədri Leonid Slutski, Kommunist Partiyasından Nikolay Xaritonov və Yeni Xalq Partiyasından Vladislav Davankovdur.
Gununsesi.info
