2019-cu ildə Türkiyədə qızıl istehsalı illik ifadədə 40% artaraq Cümhuriyyət tarixinin rekordunu vurub.
Gununsesi.org-un Türkiyə mətbuatına istinadən verdiyi məlumata görə, bu barədə Qızıl Mədənçilər Dərnəyinin rəhbəri Hasan Yücel məlumat verib.
Hasan Yücel yazılı açıqlamasında 2018-ci ildə 27,1 ton olan qızıl hasilatının 2019-cu ildə 40% artaraq 38 tona yüksəldiyini və Türkiyənin Avropanın ən böyük qızıl istehsalçısı səviyyəsinə çatdığını bildirib: “2017-ci ildə ölkədə qızıl hasilatı artmağa başladı və 2019-cu ildə 38 tonluq istehsalla Cümhuriyyət tarixinin rekordu qeydə alındı”.
Türkiyədə qızıl istehsalına 2001-ci ildən başlandığını bildirən H. Yücel həmin il 1,4 ton olan qızıl hasilatının illərlə artdığını və bu il üçün qızıl hasilatının 45 tondan çox olmaqla yeni bir rekord qıracağının proqnozlaşdırıldığını vurğulayıb.
Qeyd edək ki, Türkiyədə 2001-2019-cu illərdə cəmi 338 ton qızıl istehsal olunub.
