Ukrayna Prezidenti Vladimir Zelenskinin bazar ertəsi günü Parisdə Fransa ilə hava hücumundan müdafiə, döyüş təyyarələri və raketlərin təchizatı üzrə yeni müqavilələr imzalayacağı gözlənilir.
Gununsesi.info xarici mediaya istinadən xəbər verir ki, bu addım Ukraynanın Rusiyaya qarşı uzunmüddətli müdafiə potensialını gücləndirməyi hədəfləyir.
Zelenski son günlərdə Rusiyanın artan raket və dron hücumları fonunda Prezident Emmanuel Makronla görüşmək üçün Fransaya gedib. O, X-də bildirib ki, Fransa ilə “döyüş aviasiyası və hava hücumundan müdafiəsinin ciddi gücləndirilməsi” barədə tarixi razılaşma hazırlanır.
Məlumata görə, tərəflər Rafale döyüş təyyarələrinin Ukraynaya verilməsini nəzərdə tutan 10 illik strateji aviasiya müqaviləsini də imzalaya bilərlər. Bundan əlavə, daha çox SAMP/T hava hücumundan müdafiə sistemləri, raketlər və anti-dron avadanlıqları üzrə anlaşmalar gözlənilir.
Fransa daha əvvəl Ukraynaya Aster 30 raketləri və SAMP/T batareyaları verməyi vəd etmişdi. Yeni razılaşmaların maliyyələşmə modeli hələ açıqlanmayıb.
Zelenski həmçinin Dassault və digər şirkətlərin brifinqinə qatılacaq, daha sonra bir sıra niyyət məktubları və müqavilələr imzalanacaq. Günün ikinci yarısında Ukrayna və Fransa dron istehsalçıları əməkdaşlıq perspektivlərini müzakirə edəcək.
Fransa və Böyük Britaniya Rusiya ilə mümkün sülhdən sonra Ukraynanın təhlükəsizliyini təmin etmək üçün geniş beynəlxalq koalisiya yaradılmasını təklif edir. Məqsəd Kiyevin ordusunu uzunmüddətli təhlükələrə qarşı güclü saxlamaqdır.
Firuzə
