Bu gün Ümumdünya Qan Donoru Günüdür.
Gununsesi.info-nun xəbərinə görə, 2005-ci ilin mayında Cenevrədə keçirilən Dünya Səhiyyə Təşkilatı Asambleyasının 88-ci sessiyasında iyunun 14-nü könüllü qan verən donorlarının şərəfinə Ümumdünya Qan Donoru Günü kimi qəbul etmək barədə qərar qəbul edilib.
Həmin günün iyunun 14-də qeyd edilməsi məşhur Avstriya həkim-immunoloqu, ABO sistemi üzrə qan qruplarını kəşf edən Nobel mükafatı laureatı Karl Landşteynerin doğum günü ilə əlaqədardır.
Ümumdünya Qan Donoru Gününün qeyd olunması ictimaiyyətin diqqətini insanlığın təhlükəsiz qan və qan komponentlərinə olan tələbatına cəlb etmək, bu sahədə əhalini məlumatlandırmaq və başqalarının həyatını xilas etmək naminə təmənnasız olaraq öz qanını verən xeyirxah və mərhəmətli qan donorlarına hörmət və ehtiram göstərmək məqsədi daşıyır. Şəfqət, mərhəmət, humanizm kimi xeyirxah hissləri özündə birləşdirən həmin günün təsisi edilməsinin təşəbbüskarı Dünya Səhiyyə Təşkilatı, Qızıl Xaç və Qızıl Aypara Cəmiyyətləri və Beynəlxalq Donor Qanı Təşkilatı və Beynəlxalq Qanköçürmə Cəmiyyətidir.
Gülnaz Qənbərli
Gununsesi.info
