“Yeni Müsavat” qəzetinin baş direktoru Ələsgər Süleymanov 21 ildən bəri üzvü olduğu Müsavat Partiyasından istefa verdiyini bəyan edib. O, bu barədə sosial şəbəkədəki səhifəsində müvafiq status yazıb. Gununsesi.info Ə.Süleymanovun statusunu olduğu kimi təqdim edir.
“21 ildir Müsavat Partiyasının üzvüyəm. Bu günəcən partiyaya minlərlə adamın üzv olduğunun və istefa verdiyinin şahidi olmuşam. Həmişə özüm-özümə sual vermişəm ki, mən də istefa verə bilərəmmi? Bu qədər yol qət etiyin, heç nə etməsən belə təssübünü çəkdiyin, ən azı davranışlarında nəzərə aldığın mənsubluğundan imtina edə bilmək necə mümkündür? Son dövrlər göstərir ki, bəzən adamı bunu etməyə məcbur buraxırlar. İstefa verib gedənləri indi anlayıram. Müsavat Partiyası buna görə dağılır. Dünəndən gedən məlum müzakirələr bu fikirlərimi yenidən təzələdi.
Düşündüm. İstefa bəyanatı vermək istədim. Amma mən Arif Hacılıya görə bu partiyaya üzv yazılmamışam ki. Odur ki, burdan bəyan edirəm. Nə qədər ki, Arif Hacılı Musavat Partiyasının başqanıdır, məni istefa vermiş saya bilər!”-deyə, o, yazıb.
Qeyd edək ki, Müsavat başqanı A.Hacılı “Xural” qəzetinə verdiyi müsahibədə “Yeni Müsavat” qəzetinin baş redaktoru Rauf Arifoğlu barədə bəzi ittihamlar səsləndirib. Bu isə “Yeni Müsavat” qəzetində çalışan müsavatçılarda kəskin reaksiya doğurub.
Gülnaz Qənbərli
Gununsesi.info
