Daxili İşlər Nazirliyi (DİN) Jam.az saytının rəhbəri Fikrət Fərəməzoğlunun həbsi ilə bağlı məlumat yayıb. DİN mətbuat xidmətindən Gununsesi.info-ya daxil olan məlumata görə, Xətai rayonunda yerləşən restoranlardan birinin sahibi, paytaxt sakini DİN-ə müraciət edərək İbişbəyli Fikrət Fərəməz oğlunun rəhbəri olduğu “Jam.az” və digər saytlarda obyektinin işgüzar nüfuzuna xələl gətirən materiallar yaydığını, həmin yazıları saytdan çıxarmaq müqabilində cari ilin aprel ayında ondan 1000 manat aldığını və gələcəkdə bu səpkili materialların yazılmaması üçün hər ay 5000 manat tələb etdiyini bildirib.
Aparılan araşdırmalarla müraciətdə göstərilən xüsusatlar təsdiqini tapıb və həyata keçirilmiş əməliyyat tədbirləri ilə Fikrət İbişbəyli iyunun 30-da həmin şəxsdən eyni üsulla 3000 manat alarkən saxlanılıb.
Faktla bağlı Cinayət Məcəlləsinin 182-ci maddəsi ilə (hədə-qorxu ilə tələb etmə) cinayət işi başlanılaraq F. İbişbəyli barəsində həbs-qətimkan tədbiri seçilib.
İlkin istintaqla Fikrət İbişbəylinin ətrafına bir qrup şəxs toplayaraq çoxsaylı sahibkar və vəzifəli şəxs barəsində rüsvayedici məlumatlar yaymaq hədəsi ilə onlardan külli miqdarda pul alması müəyyən olunub.
Araşdırmalar zamanı adları istintaqa məlum olan ayrı-ayrı vətəndaşlar da Fikrət İbişbəylinin onlara qarşı anoloji cinayətlər törətdiyi barədə müraciətlər ediblər.
Hazırda faktla bağlı zəruri istintaq-əməliyyat tədbirləri davam etdirilir.
Qeyd edək ki, F. Fərəməzoğlunun həyat yoldaşının verdiyi məlumata görə, iyunun 30-u günorta saatlarında 3 nəfər mülki geyimli naməlum şəxs jurnalistin evinə daxil olaraq, axtarış aparmaq adı ilə ona məxsus “Notebook”u götürüblər. Jurnalistin həyat yoldaşı həmin şəxslərdən nə baş verdiyini soruşduqda onlar Fikrət Fərəməzoğlunun həbs edildiyini bildirsələr də, lakin həbs olunma səbəbini açıqlamayıblar.
Gülnaz Qənbərli
