Tehran Universitetinin tələbələri Prezident İbrahim Rəisinin çıxışından öncə etiraz aksiyasına cəhd edərkən təhlükəsizlik qüvvələri tərəfindən döyüldüklərini deyirlər.
Tələbə Birlikləri Şurasının Telegram kanalı dekabrın 7-də bir neçə tələbənin xəsarət aldığını bildirib.
Hər il dekabrın 7-də – İranda Tələbə Günündə çoxsaylı universitetlərdə nümayişlər təşkil edilir, tələbələr demokratik tələblər irəli sürürlər.
Onlar akademik hüquqlar, ifadə azadlığı, hökumətdən ayrı akademik müstəqilliklə yanaşı daha geniş demokratik azadlıqlar da tələb edirlər
Digər universitetlərdə də döyülənlər olub
Sentyabrın ortasından İranda davam edən etirazlarda tələbələr fəal iştirak ediblər. Etirazlar 22 yaşlı Məhsa Əmininin polis tərəfindən saxlanandan sonra vəfat etməsilə əlaqədar başlanıb. Nümayişlər amansızlıqla yatırdılıb.
Ultra-mühafizəkar Rəisi universitetdə bir qrup hökumətyönlü tələbə qarşısında çıxışında deyib ki, “etiraz iğtişaşdan fərqlidir”, qiyamçılar “sevdiklərimizin ədalətsiz ölümünə səbəb olub”.
Prezident danışarkən xeyli tələbə universitetin müxtəlif yerlərinə yığışaraq hökumətə qarşı şüarlar, “Qadın, Həyat, Azadlıq” sözlərini səsləndiriblər.
Tehrandakı AmirKabir Universiteti daxil olmaqla, bir sıra təhsil ocaqları, o cümlədən Məşhəddəki universitetlərdən tələbələrin ağır şəkildə döyülməsi xəbərləri gəlib.
Məşhəddəki Firdovsi Universitetindən şahidin sözlərinə görə, tələbələrin toplantısına təhlükəsizlik qüvvələri “hücum” edib.
Bu arada ölkədə bizneslər, mağazalar artıq üçüncü gündür qapalıdır.
AzadlıqRadiosunun fars xidməti – Radio Fərda-nın ıldə etdiyi videolarda İsfahan, Bukan və Tehranda mağaza sahiblərinin etirazlara dəstək olaraq tətil etdiyi görünür
Fəalların HRANA xəbər agentliyinin məlumatına görə, noyabrın 29-dək etirazlarda azı 459 nəfər, o cümlədən 64 azyaşlı öldürülüb.
Gununsesi.info
