Azərbaycanın AŞPA-da nümayəndə heyətinin üzvü Kamal Cəfərov qurumun payız sessiyasının sonunda azad debatlar zamanı erməni deputatın çıxışına etiraz edib.
“Qafqazinfo”nun məlumatına görə, Cəfərov çıxışı amanı qeyd edib ki, tək bir videoya baxmaqla, nəyinsə cinayət olub-olmadığı nəticəsinə gəlmək olarsa, onda ittiham və məhkəmə nəyə lazımdır?
“Videoda çox şey görə bilərsiniz, ancaq görüntü və fakt eyni şey deyil. Bəs videodakı fakt nədir? Bu çox həssas məsələdir, hansı ki siyasətçilər deyil, hüquq-mühafizə orqanları tərəfindən araşdırılmalıdır. Hüquqi baxımdan iddia edilən cinayətin bütün faktları müəyyən edilməlidir. İddia edilən cinayətin maddi və mənəvi elementləri sübut olunmalıdır”, – deyə deputat qeyd edib.
O bildirib ki, Azərbaycan Hərbi Prokurorluğu iddia edilən cinayətlə bağlı cinayət işinin başlayıb və bunu Azərbaycanın məhz beynəlxalq humanitar hüquqa sıx bağlılığına görə edib: “Ancaq Ermənistan tərəfindən onların hərbçilərinin bizim həlak olmuş əsgərlərimizə qarşı etdikləri qeyri-insani və alçaldıcı davranışı əks etdirən videolarla bağlı heç nə eşitmədik. Yalnız onu eşitdik ki, Ermənistan hüquq mühafizə orqanları bizim azad etdiyimiz ermənilərə qarşı cinayət işi açırlar. Erməni deputatlar bura gəlir, saxlanılan erməni cinayətkarların azad olunması ilə bağlı çağırış edirlər. Ancaq biz onları azad edən kimi, öz ölkələrində onlara qarşı cinayət işi açırlar. İndi saxlanılan erməni cinayətkarla Ermənistana deyil, hansısa üçüncü ölkəyə getmək istəyirlər. Bu ikiüzlülüyün ən bariz nümunəsidir ki, o da buradakı bəzi deputatların içində dərin kök saldığı aydın görünür. Hər kəs bilsin ki, Xocalıda baş verənləri unutmaqdıq və unutmayacağıq. Erməni silahlı qüvvələri bir gecədə 613 mülki əhalini qəddarlıqla qətlə yetiriblər”.
Kamal Cəfərov vurğulayıb ki, Birinci Qarabağ müharibəsindən sonra, dörd min Azərbaycanlı hələ də itkindir: “Ermənistanın hərbi-siyasi rəhbərliyindən tələb edirəm ki, kütləvi məzarlıqların yerini bizə təqdim etsinlər.
İki həftə bundan əvvəl, işgəncə verilmiş və öldürülmüş Azərbaycan hərbiçilərin kütləvi məzarlığı Edilli kəndində tapılıb. Edilli kəndi Ermənistan hərbiçiləri tərəfindən Azərbaycanlı girovlar üçün həbs düşərgəsi kimi istifadə edilib.
2020-ci ilin noyabr ayından bu günə qədər, Ermənistan tərəfindən bizim ərazimizdə basdırılan minalara görə 250-dən çox insan ölüb və ya ağır yaralanıb. Laçın şəhərinin azad edilməsindən sonra müəyyən etdik ki, Ermənistan 2021-ci ildə Laçında 1400-dən çox mina basdırıb. Belə ki, onlar Azərbaycana saxta mina xəritələrini təqdim edərkən, minlərlə yeni minanı bizim ərazilərdə basdırırdıqları aydın görünür”.
Gununsesi.info
