ABŞ Konqresinin Nümayəndələr Palatasına nəzarət edən respublikaçılar Ukraynaya yardım üçün vəsait ayırmağın bir neçə variantını nəzərdən keçirirlər.
Gununsesi.info xəbər verir ki, bu barədə mənbələrə istinadən “Punchbowl News” portalı məlumat yayıb.
Aprelin 9-dək fasiləyə çıxan qanunvericilər Kiyevə dəstəyi davam etdirmək üçün artıq müvafiq plana malik olmaqla, işə qayıtmaq niyyətindədirlər. Mənbələr hesab edir ki, Aşağı Palatanın spikeri Mayk Consonun ABŞ Senatının əvvəllər təklif etdiyi qanun layihəsini indiki formada səsverməyə çıxarması ehtimalı azdır.
Ola bilsin ki, o, Konqresin yuxarı palatasında baxılarkən mübahisəyə səbəb olmayan sənədə dəyişikliklər etsin. Xüsusilə, o, Kiyevə “lend-liz” şəklində yardım təklif edə bilər.
Bundan əlavə, Conson Nümayəndələr Palatasının üzvü Brayan Fitspatrikin təşəbbüsünü nəzərə ala bilər, o, əvvəllər Ukraynaya yardım üçün vəsaitin ayrılmasını ehtiva edən, lakin Birləşmiş Ştatların cənub sərhədində nəzarət tədbirlərinin gücləndirilməsini nəzərdə tutan ikitərəfli qanun layihəsinin hazırlanmasını təklif etmişdi.
Portalın mənbələrinə görə, bu, demokratları qorxuda bilər. Eyni zamanda, Conson partiya yoldaşlarına Ukraynaya yardım da daxil olmaqla əlavə maliyyə ayrılması haqqında qanun layihəsinin dərhal səsə qoyulmasını tələb edən Demokratların petisiyasını dəstəkləməyə icazə verə bilər.
Portal qeyd edib ki, belə bir addım Consonun Nümayəndələr Palatasına kifayət qədər nəzarəti olmadığını və son nəticədə onun spiker postundan mümkün uzaqlaşdırılmasına səbəb ola bilər.
Martın 8-də “NBC” televiziyası mənbələrə istinadən xəbər verdi ki, Nümayəndələr Palatasındakı respublikaçılar Kiyevə kredit verəcək öz yardım paketi üzərində işləyirlər. İş ilkin mərhələdədir və Kiyevə qeyri-hərbi yardımın bir hissəsinin kredit kimi ayrılması imkanları araşdırılır.
Bundan əvvəl Ukrayna Ali Radasının Büdcə Komitəsinin sədri Roksolana Pidlasa bildirib ki, ABŞ Konqresi Kiyevə yardımı təsdiq etmədiyi halda, Ukrayna əlavə maliyyə dəstəyi almaq üçün Yaponiya və Kanada ilə danışıqlar aparır.
Gununsesi.info
