“Mehman Əliyevin həbsinin girovla əvəzlənməsi barədə Yasamal Rayon Məhkəməsinə vəsatət verdim”.
Gununsesi.info-nun xəbərinə görə, bu haqda M.Əliyevin vəkili Fuad Ağayev sosial şəbəkədəki səhifəsində belə yazıb.
Vəkilin sözlərinə görə, avqustun 24-də saat 18.20-də Mehman Əliyevə onun şübhəli şəxs qismində tutulması haqqında qərar elan edilib. Müstəntiqin qərarına əsasən Cinayət Prossesual Məcəllənin 147.2.1 maddəsinə istinadən, yəni M.Əliyev cinayət törətməsinə şübhə yarandığına görə o, tutulub:
“Bu zaman istintaq orqanı həmin məcəllənin 148.3.1-ci maddəsini əsas tutub. Həmin maddəyə görə, müstəntiq şəxsi o zaman tuta bilər ki, o, hadisə yerindən qaçıb gizlənməyə, yaxud cinayət prosesini həyata keçirən orqandan gizlənməyə cəhd göstərsin. Həmin qərar tamamilə qanunsuz olduğu üçün müdafiə tərəfi ondan məhkəməyə şikayət verib. Şikayətin əsas dəlili budur: Mehman Əliyevin istintaqdan yayınmadığı, dəfələrlə dindirmələrə könüllü gəldiyindən, onun istintaqdan qaçıb gizlənmə cəhdi olmadığından, bunu heç xəyalına da gətirmədiyindən, qərar uydurma dəlilə əsaslanır, qanunvericilik normaları ilə bir araya sığmır”.
F.Ağayev qeyd edib ki, Yasamal Rayon Məhkəməsi şikayəti təmin etməyib, 24 avqust tarixli tutma qərarını qanuni sayıb:
“Hakim Hüseyn Səfərovun fikrincə, Mehman Əliyev 24 avqustda tutulsa da, bundan bir gün sonra, avqustun 25-də onun həbsi barədə məhkəmə qərarı çıxıb, onun tutulması da qanunidir. Halbuki, hakim yalnız və yalnız onu araşdırmalı idi ki, Mehman Əliyev istintaqdan qaçmağa cəhd göstərib, ya yox. Məhkəmə bu məsələyə qiymət verməkdən yayınıb ki, Mehman müəllimin qaçmaq cəhdinə dair uydurmanı yazmasın. Halbuki, tutulma barədə qərar müstəqil şəkildə, post-faktum qaydada deyil, bu qərar qəbul edilənə qədər mövcud sübutlarla təsdiq olunmalı idi”.
Fuad Ağayev prosesin nə vaxta təyin ediləcəyini isə hələ bilmir.
Qeyd edək ki, avqustun 24-də M.Əliyev “Turan” İA-nə qarşı cinayət işi çərçivəsində şahid qismində Vergilər Nazirliyinə dindirilməyə çağırılıb. M.Əliyev öz vəkili ilə nazirliyə gedib. Ancaq bildiriblər ki, onun statusu “şahiddən şübhəli şəxs” statusuna dəyişdirilib və vəkilin dindirmədə iştirakına icazə verməyiblər. Avqustun 25-də isə məhkəmə Mehman Əliyevi vergidən yayınma, vəzifə səlahiyyətindən sui-istifadə və qanunsuz sahibkarlıq ittihamı ilə həbs edib.
Gülnaz Qənbərli
Gununsesi.info
