Bu gün Bakı Ağır Cinayətlər Məhkəməsində Binəqədi rayonunda yaşayış binasında baş verən yanğınla bağlı təqsirləndirilən şəxslərin cinayət işi üzrə məhkəmə prosesi davam etdirilib. Qəzənfər Novruzovun qardaşı oğlu Orxan Novruzovun Gununsesi.info-ya verdiyi məlumata görə, prosesdə zərərçəkmiş şəxslər ifadə verib. Zərərçəkmiş qismində ifadə verən İdris Xəlilov həbs olunan şəxslərdən şikayətçi olmadığını deyib. O bildirib ki, binada yanğın təxminən saat 11 radələrində başlayıb və 19:00-da başa çatıb. İ.Xəlilov qeyd edib ki, zərərçəkmişlərə dövlət tərəfindən 20 min manat pul verilib: “Mənzilimiz tam təmir olunaraq bizə təhvil verilib. Eləcə də yanğın zamanı sıradan çıxan avadanlıqlarımız da alınıb”.
Zərərçəkmiş Feyzulla Bağırov isə yanğın nəticəsində bacısını və qardaşını itirdiyini deyib. F. Bağırov təqsirləndirilən şəxslərin təqsiri sübut olunduğu halda həyatını itirən qardaş və bacısının hər biri üçün 100 min manat təzminat tələb edib.
Zərərçəkmiş Adilə Zeynalova ifadəsində evinin tamamilə yandığını qeyd edib. O, hadisəyə səbəb olmuş şəxslərdən 52 min manat təzminat istəyib.
Zərərçəkmiş Heyvagül Əfəndiyeva isə hadisə zamanı evdə tək olduğunu, lakin, qəfildən siqaret qoxusu hiss etdiyini bildirib: “Bir az sonra pəncərədən ağ tüstü qalxdı. 2012-ci ildə binanın örtüyünün alışan maddələrdən olduğunu görəndə qonşular şikayət etmişdi. Binaya üzlük çəkənlər işi dayandırsalar da, sonradan davam etdi”.
Məhkəmə prosesi iyulun 14-də davam etdiriləcək.
Qeyd edək ki, ötən il mayın 19-da paytaxtın Binəqədi rayonu ərazisində çoxmərtəbəli yaşayış binasında ağır nəticələrə səbəb olmuş yanğınla bağlı binaların üzlənməsində istifadə olunan “poliuretan” məmulatını istehsal edən “Qlobal Stone” və “Global Constuction” MMC təsisçisi Yusif Mahmudov, “Qlobal Stone” MMC-nin baş direktoru Uğur Bəşirov, “Global Construction” MMC-nin sədr müavini Ələkbər Əsgərov, 2012-2013-cü illərdə Binəqədi rayon mənzil-kommunal təsərrüfat birliyinin rəisi işləmiş rayon icra hakimiyyətinin təsərrüfat şöbəsinin müdiri Ədalət Rəcəbov, Binəqədi rayonu, 72 saylı mənzil-kommunal istismar sahəsinin rəisi Nizami Orucov və binanın poliuretan materialla üzlənməsi işlərinə nəzarət funksiyalarını həyata keçirməli olan, 2012-2013-cü illərdə Binəqədi rayon İcra Hakimiyyəti başçısının birinci müavini işləmiş Qəzənfər Novruzov, Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə təqsirləndirilən şəxs qismində cəlb edilərək barələrində məhkəmənin qərarları həbs qətimkan tədbiri seçilib.
Bundan başqa, cinayət işinə “Dərnəgül Boru” Zavodunun laboratoriya rəhbəri Ağacavad Məmmədov və Səhiyyə Nazirliyi yanında Gigiyena və Epidemiologiya Mərkəzinin baş direktoru Akif Əlibəyov da cəlb edilib. Onlar barəsində həbs-qətimkan tədbiri seçilməyib.
Yanğın nəticəsində 15 nəfər həyatını itirib. 50 nəfər xəsarət alıb.
Xəyalə Xanəziz
