“İncəsənət xadimlərinincənab prezidentlə birgə keçirdiyi gün çox şərəfli gün idi. Demək istədiklərimin hamısını cənab prezidentlə görüşdə dedim. Ona görə də açıqlamalara heç bir əlavəm yoxdur”.
Gununsesi.org xəbər verir ki, bunu Modern.az-a açıqlamasında “Planet Parni iz Baku” KVN teatrının bədii rəhbəri, əməkdar artist Tahir İmanov prezident İlham Əliyevlə incəsənət xadimlərinin görüşünə münasibət bildirərkən deyib.
2015-ci ildən efirlərə çıxmaq qadağası qoyulan İmanov qardaşlarına bununla bağlı hər hansı zəng olmayıb.
“Cənab prezidentlə görüşdən sonra hələ ki, heç bir zəng olmayıb. Həftə sonudur. Qeyri-iş günüdür. Yəqin ki, gələn həftənin əvvəli televiziyalardan zənglər olacaq. Buna şübhə etmirəm. Cənab prezidentin sözünü kimsə iki edə bilməz”.
Tahir İmanov bildirib ki, bir qədər səbirli olmaq lazımdır.
“Hələ ki, heç bir televiziya əməkdaşlıq məsələsi ilə bağlı bizə zəng etməyib. Düşünürəm ki, bir qədər səbirli olaq! Üzümüzə gələn növbəti həftəni gözləyək və görək nə olacaq. Hələlik heç bir yenilik yoxdur”
Qeyd edək ki, bir müddət əvvəl Tahir İmanov mətbuata açıqlamasında 2015-ci ilin mayından etibarən bütün televiziyalar tərəfindən Planet Parni iz Baku” KVN teatrının əməkdaşlarına efir qadağası qoyulduğunu bildirib.
