Qeyd edək ki, bundan əvvəl Ermənistanın Milli Təhlükəsizlik Şurasının katibi Armen Qriqoryan Belarusun Ermənistandakı səfiri İqor Nazarçukla görüşərək, KTMT çərçivəsində müttəfiqlik öhdəliyi olan rəsmi Minskin Azərbaycanı silahlandırmasını qınamışdı. Ermənistan XİN-in yaydığı bəyanatda isə Belarusun bu addımından təəssüf hissi keçirdikləri bildirilmişdi.
Xatırladaq ki, Azərbaycan Respublikası ilə Belarus Respublikası arasında hökumətlərarası razılaşmaya əsasən ölkəmizə gətirilən 301 mm-lik “Polonez”lər artıq ordumuzun silahlanmasına daxil edilib. Belarus 2018-ci ildə 10 ədəd “Polonez” reaktiv yaylım atəşi sistemlərinin (РСЗО) ixracına dair ilk müqavilənin yerinə yetirilməsini planlaşdırıb. “Polonez”in istehsalına 2014-cü ildə başlanıb. “Polonez”in bir maşını raketlərlə eyni zamanda səkkiz hədəfə dəqiq zərbə endirməyə imkan verir. Belə ki, bir maşın üzərində döyüşə hazır 8 raket mövcuddur. Bu isə “Polonezi” Rusiyanın Ermənistana verdiyi “İskəndər” raketlərindən daha dəqiq, dağıdıcı və məhsuldar edir.