İran İslam Respublikasının prezidenti Həsən Ruhani avqust ayında Azərbaycana gələcək. Gununsesi.info-nun məlumatına görə, səfər iki gün çəkəcək. H.Ruhaninin Azərbaycana səfərinin məqsədi Azərbaycan və Rusiya prezidentləri ilə üçtərəfli görüşdə iştirak etməkdir. İran mətbuatının yazdığına görə, görüşdə üçtərəfli sənədin imzalanması gözlənilir.
Həmçinin iranlı prezidentinin gündəliyinə prezident İlham Əliyev və Vladimir Putinlə ayrı-ayrılıqda görüşlər də daxildir. Səfər çərçivəsində Azərbaycan və İran prezidentləri daha əvvəl imzalanmış razılaşmalara nəzər yetirəcək, eləcə də ikitərəfli əlaqələrin genişləndirilməsi imkanlarını gözdən keçirib müzakirə edəcəklər.
Xatırladaq ki, Rusiya mətbuatında görüşlə bağlı prezidentinin mətbuat katibi Dmitri Peskovun da bir neçə gün əvvəl Putinin avqust ayında Bakıya səfərinin hazırlandığını bildirib.
Azərbaycan, İran və Rusiya prezidentlərinin Bakıda görüşünün keçirilməsi bu ölkələrin xarici işlər nazirlərinin aprelin 7-də Bakıdakı üçtərəfli görüşündə qərara alınıb.
Gülnaz Qənbərli
