Şirkət rəhbəri əcnəbinin 3.5 milyonunu ələ keçirdi

Azərbaycanda şirkət rəhbəri əcnəbi vətəndaşın xüsusilə külli miqdarda pulunu ələ keçirib.

“Qafqazinfo” Baş Prokurorluğun Mətbuat xidmətinə istinadən xəbər verir ki, Korrupsiyaya qarşı Mübarizə Baş İdarəsində istintaq olunaraq baxılması üçün məhkəməyə göndərilmiş “Kat Holdinq” MMC-nin təsisçisi və faktiki rəhbəri Ələkbərov Elçin Bəşir oğlu Cinayət Məcəlləsinin 178.4, 179.4, 32.4, 312.1, 313 və 308.2-ci maddələri və həmin Cəmiyyətin direktoru İbadov Mail Məcid oğlu Cinayət Məcəlləsinin 179.4 və 308.2-ci maddələri ilə təqsirləndirilir. Onun barəsindəki işə Bakı Ağır Cinayətlər Məhkəməsində baxılır.

Qeyd edilib ki, həmin cinayət işi üzrə təqsirləndirilən şəxs Elçin Ələkbərova Litva Respublikası vətəndaşı Povilas Pociusa məxsus 3 520 763 manat (2 070 745 ABŞ dolları) məbləğində pul vəsaitlərinin ələ keçirilərək dələduzluq edilməsinə, habelə təqsirləndirilən şəxslər tərəfindən “Kat Holdinq” MMC-yə məxsus olmaqla onlara etibar edilmiş ümumilikdə 34 şəxs tərəfindən mənzil satışına görə ödənilmiş cəmi 1 900 128,68 manat məbləğində pul vəsaitinin 1 569 404,68 manatının mənimsənilməsinə və digər cinayət əməllərinə görə ittihamlar irəli sürülüb.

Cinayət işi üzrə dəymiş ziyanın ödənilməsinin təmin edilməsi məqsədilə təqribən 5,9 milyon manat dəyərində əmlak üzərinə həbs qoyulub və hazırda dəymiş ziyanın ödətdirilməsi istiqamətində zəruri tədbirlər görülür.

Baş Prokurorluqdan, həmçinin bildirilib ki, qeyd olunan cinayət işinin ibtidai istintaqı zamanı Azərbaycan Mənzil İnşaatı Dövlət Agentliyinin vəzifəli şəxslərinin həmin cinayət əməllərinin törədilməsində iştirakı, eləcə də Agentliyə məxsus pul vəsaiti və ya əmlakın ələ keçirilməsi halları müəyyən edilməyib.

Gununsesi.info