Bu ilin 1-ci rübünün nəticələrinə görə, dünyanın ən böyük 12 neft şirkətinin – ExxonMobil, Chevron, ConocoPhillips, Halliburton, Schlumberger, Baker Hughes, Royal Dutch Shell, BP, Total, Eni, Rosneft və Equinor – birlikdə zərəri 20,6 milyard dollar olub. Dünyanın nəhəng şirkətlərinin bu dövrdə ümumi gəliri 53,5 milyard dollar və ya 17 faiz azalaraq 262 milyard dollara düşüb. Məlumat üçün qeyd edim ki, ötən ilin yanvar-mart aylarında həmin şirkətlər 315,5 milyard dollarlıq gəlir əldə etmişdi. Adı sadalanan şirkətlərin bəzilərinin (BP, Total, Equinor ) Azərbaycanda da işləməsi onların bizim ölkədəki fəaliyyətinə də təsirsiz ötüşməyəcək. Bununla yanaşı, hər kəsi düşündürən dövlət neft şirkəti – SOCAR-ın maliyyə durumudur. Təəssüflər olsun ki, SOCAR nəinki bu ilin 1-cü rübünə dair nəticələri, hətta ötən il üçün maliyyə-təsərrüfat fəaliyyətinin yekunlarını il başa çatmasınan 5 aya qədər vaxt ötməsinə baxmayaraq, hələ də açıqlamayıb. SOCAR-ın saytında ən sonuncu maliyyə hesabatı 2018-ci ili əhatə edir: http://socar.az/socar/az/economics-and-statistics/economics-and-statistics/socar-reports
SOCAR da bu ilin ilk rübündə çox şübhəsiz ki, zərərlə qarşılaşıb, amma, onun ziyanı dünya nəhənglərində olduğu kimi milyardlarla deyil, yəqin ki, yüz milyonlarla olar. İstənilən halda, SOCAR maliyyə fəaliyyətinin yekunlarının xarakterizə edən göstəriciləri aylıq olmasa da, rüblük əsasda açıqlamağa borcludur, çünki dövlət şirkətidir.
Qubad İbadoğlu
