Şükürov Şahlar Əvəz oğlu 17 may 1952-ci il tarixində Kəlbəcərin Zülfüqarlı kəndində anadan olub. 1972-ci ildə Azərbaycan Xalq Təsərrüfatı İnstitutunu bitirib hərbi xidmətə gedib. Ordudan tərxis edildikdən sonra Ucar rayonu Daxili İşlər Şöbəsində çalışıb.
1986-cı ildə Rostov Ali Polis Akademiyasını bitirib. Zərdab rayonunda rəis müavini vəzifəsində çalışan Şahlar Şükürov mayor rütbəsi alıb.
11 iyul 1990-cı il tarixində Tərtər-Kəlbəcər yolu ilə hərəkət edən maşın karvanı Ağdərə ərazisində ermənilərin qəfil hücumuna məruz qalan zaman qeyri-bərabər döyüşdə qəhrəmanlıq nümayiş etdirərək, yüzlərlə xəstə, uşaq, qoca-qarı, bir sözlə Kəlbəcərin İstisu sanatoriyasına gedənlərin yüzdən artıq maşından ibarət karvanını erməni terrorundan xilas edərək həlak olub.
Ailəli idi. İki övladı var.
Azərbaycan Respublikası Prezidentinin 8 oktyabr 1992-ci il tarixli, 264 nömrəli Fərmanı ilə polis mayoru Şükürov Şahlar Əvəz oğlu (ölümündən sonra) Azərbaycanın Milli Qəhrəmanı adına layiq görülüb. Kəlbəcər rayonunun Zülfüqarlı kəndində dəfn olunub. Zərdab rayonunda adına məktəb və küçə var.
Gununsesi.info
