“Qurban Bayramı ilə bağlı əfv olmayacaq”.
Bu haqda Gununsesi.info-ya Azərbaycan Prezidenti yanında Əfv Məsələləri Komissiyasının üzvü, millət vəkili Elmira Axundova açıqlamasında deyib. Millət vəkili qeyd edib ki, bununla bağlı komissiyanın iclası keçirilməyib: “Yaxın günlərdə Əfv Komissiyasının iclasının keçiriləcəyi də gözlənilmir. Amnistiya aktı yenicə başa çatıb. Buna baxmayaraq, əfv sərəncamının verilməsi birbaşa prezident İlham Əliyevin müstəsna səlahiyyətinə aid olan məsələdir”-, deyə E.Axundova bildirib.
Qeyd edək ki, Azərbaycanda sonuncu əfv sərəncamı 2016-cı ilin mart ayında verilib. Prezidentin imzaladığı sərəncam əsasən əfv 148 nəfərə şamil olunub. Azadlıqdan məhrum etmə cəzasına məhkum edilmiş 137 nəfər cəzanın çəkilməmiş hissəsindən, islah işləri cəzasına məhkum edilmiş 6 nəfər cəzanın çəkilməmiş hissəsindən və cərimə cəzasına məhkum edilmiş 5 nəfər cəzadan azad ediliblər. Həbsdən azad edilənlər arasında tanınmış insanlar da var.
Xatırladaq ki, Heydər Əliyev Fondunun prezidenti, Milli Məclisin deputatı Mehriban Əliyevanın təşəbbüsü ilə Milli Məclisin “28 May – Respublika Günü münasibətilə amnistiya elan edilməsi haqqında” 20 may 2016-cı il tarixli qərarına əsasən amnistiya aktı hazırkı vaxtadək 9 minə yaxın şəxsə tətbiq olunub.
Gülnaz Qənbərli
Gununsesi.info