Bakı Ağır Cinayətlər Məhkəməsinin keçmiş hakimi Ənvər Seyidovun iddiası əsasında məhkəmə iclası başa çatıb.
Gununsesi.org xəbər verir ki, 1 saylı Bakı İnzibati-İqtisadi Məhkəməsinin hakimi Miminat Hacıbəyovanın sədrliyi ilə keçirilən prosesdə qərar elan olunub.
Qərara əsasən, sabiq hakimin iddiası qismən təmin edilib.
Qeyd edək ki, Bakı Ağır Cinayətlər Məhkəməsinin keçmiş hakimi Ə.Seyidov pensiyasının artırılması üçün 1 saylı Bakı İnzibati-İqtisadi Məhkəməsinə müraciət edib. Əmək və Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu, Xüsusi şərtlərlə təyinat idarəsini məhkəməyə verən keçmiş hakim pensiyasının düzgün hesablanmasını istəyir.
Ə.Seyidov bu il təqaüdə göndərilib.
Xatırladaq ki, bir müddət əvvəl Bakı Ağır Cinayətlər Məhkəməsinin sabiq hakimi Azər Orucov da Dövlət Sosial Fondunun Nəsimi Rayon Şöbəsini məhkəməyə verib. O, pensiyasının miqdarından narazı olduğu üçün məhkəməyə müraciət edib. 1 saylı Bakı İnzibati-İqtisadi Məhkəməsi A.Orucovun iddiasını təmin edib.
A.Orucov ötən ilin əvvəlində yaş həddi ilə əlaqədar təqaüdə göndərilib.
Xatırladaq ki, Azərbaycanda məhkəmə hakimlərinin maaşı minimum 1500 manatdan başlayır.
