Azərbaycanlı tələbələr beynəlxalq müsabiqədə qızıl medal qazandılar - FOTO

  • By admin
  • 02 Aprel 2018 18:20

Bakı Mühəndislik Universitetinin tələbələri Beynəlxalq proqramlaşdırma müsabiqəsinin qalibi olub.

Bu barədə Gununsesi.info-ya Bakı Mühəndislik Universitetindən məlumat verilib. 

Bildirilib ki, “Hello India x Russia Programming Bootcamp ACM-ICPC 2018” beynəlxalq proqramlaşdırma təlimləri və müsabiqəsi 22-30 mart tarixlərində Hindistanın Amritapuri vilayətində Amrita Mühəndislik Məktəbinin bazasında keçirilib. Beynəlxalq təlim və müsabiqə  “Harbour Space University”, “Amrita School of Engineering”, “Codeforces” və “Moscow Workshops ACM-ICPC”-nin birgə təşkilatçılığı ilə keçirilib.

Təlimlər çərçivəsində keçirilən müsabiqələrdə Bakı Mühəndislik Universitetinin “BEU Programmers” komandası ən yaxşı nəticə (7 müsabiqədə – 2 dəfə ikinci, 5 dəfə birinci yer olmaqla) göstərərək, yekun nəticəyə görə, “Hello India x Russia Programming Bootcamp ACM-ICPC 2018” beynəlxalq proqramlaşdırma müsabiqəsinin qalibi olub və qızıl medala layiq görülüb.

Rusiyanın bu sahədə tanınmış mütəxəssisləri tərəfindən keçirilən beynəlxalq təlimlər ACM-ICPC Beynəlxalq Proqramlaşdırma müsabiqələrinə hazırlıq məqsədi daşıyır.
Təlim və müsabiqələrdə 8 ölkənin (Hindistan, Azərbaycan, İordaniya, Litva, Oman, Rusiya, Sinqapur, Yaponiya) 28 ali təhsil müəssisəsi, 3 kollec və 3 şirkətdən 39 komanda iştirak edib.

Hello India x Russia Programming Bootcamp ACM-ICPC 2018” beynəlxalq proqramlaşdırma təlimləri və müsabiqəsində Azərbaycandan Bakı Mühəndislik Universitetinin “Kompüter və İnformasiya Texnologiyaları” kafedrasının baş müəllimi Etibar Seyidzadənin rəhbərliyi ilə “BEU Programmers” komandası (Rəşad Məmmədov, Mahmud Allahverdiyev, Rəsul Kərimov) iştirak edib.

Qeyd edək ki, Bakı Mühəndislik Universitetinin “BEU Programmers” komandasının proqramda iştirakının bütün xərcləri Azərbaycanın yerli şirkətləri olan “AzEduNet”, “Təhsildə İnnovativ Texnologiyalar”, “Edumedia Azərbaycan”, “Ultra Technologies”, və “ENGINET” tərəfindən sponsorluq dəstəyi ilə təmin edilib.

Mürtəza

Gununsesi.info