“Firmaların satdığı bir sıra dərmanların reklamı zamanı ehtiyatlı olmaq lazımdır”.
Gununsesi.info xəbər verir ki, bu fikri Milli Məclisin Səhiyyə komitəsinin sədri Əhliman Əmiraslanov komitənin bu gün keçirilən iclasında “Dərman vasitələri haqqında” qanuna dəyişikliklər məsələsinin müzakirəsi zamanı deyib.
Onun sözlərinə görə, dərman firmalarının satdığı bir sıra dərman preparatlarının istər telekanallarda, istərsə də xəstəxanalarda geniş təbliğatı ciddi problemlərə yol açır. “Ona görə də, dərman preparatlarının reklamına ehtiyatla yanaşmaq lazımdır. Çünki bu gün dərman firmaları xəsətəxana-xəstəxana gəzərək öz dərmanlarını reklam etməyə çalışır. Həkimlərə hansı vasitə ilə yol taparaq, onları stimullaşdırmaq yolu ilə həvəsləndirməyə çalışırlar. Bu da nəticədə xoşagəlməz hallara yol açır”- deyə, komitə sədri vurğulayıb.
Komitə sədri onu da əlavə edib ki, bu gün Avropa saytlarında dərman preparatlarının reklamına az rast gəlinir: “Ancaq Rusiya saytlarında dərmanla bağlı geniş reklamlar yer alır. Bu da təhlükəlidir. Bir də baxırsan bu mətbu orqanları yazır ki, xərçəngin, şəkərin və yaxud hansısa digər ciddi bir xəstəliyin dərmanı tapılıb. İstifadə edin həmən bu xəstəlikdən xilas olacaqsınız. İnsanlar da buna inanaraq dərmanlardan istifadə edir və nəticədə daha pis vəziyyətə düşürlər. Bu cür reklamlar ziyanlıdır və bundan qaçmaq lazımdır. Odur ki, dərmanların reklamında müəyyən çərçivələr olmalıdır”.
Mürtəza
Gununsesi.info
