Xəbər verildiyi kimi¸ oktyabrın 7-də Prezident İlham Əliyevin iştirakı ilə Azərbaycan Nazirlər Kabinetinin 2016 – cı ilin keçən 9 ayının sosial-iqtisadi inkişafın yekunlarına həsr olunmuş iclası keçirilib. İclasda prezident İlham Əliyev Azərbaycanda və dünyada baş verən proseslər haqqında danışıb. Nitqin özü və onun müxtəlif prizmalardan şərhləri yerli mətbuatda dərc olunub.
Biz də bu mövzuda fikirlərimizi yazmaq zərurəti hiss etdik. Bizim nəzərimizcə, Azərbaycan prezidentinin çıxışının özəti belədir:
Prezidentin nitqini ümumilikdə iki hissəyə – daxili və xarici siyasətə yönəlik mesajlar verməsi ilə, təhlil edə bilərik.
Xarici siyasətlə bağlı: Prezident İlham Əliyev dünyada baş verən böhranlardan, bu böhranların neft hasil edən ölkələrə mənfi təsirlərindən, Avropanın mühacir və qaçqın problemlərindən, ərəb qaçqınlarına tətbiq etdiyi ikili standartlardan ,Yaxın Şərqdəki mövcud vəziyyət haqqında əhatəli danışıb. Həmçinin prezident İlham Əliyev Azərbaycanın yürütdüyü uğurlu xarici siyasətə aksent edərək, prezidentliyi dövründə xarici siyasətinin əsasını təşkil edən beynəlxalq münasibətlərdə balanslaşdırılmış siyasətin üstünlüklərini sadalayıb, bu siyasətin Azərbaycan üçün sabitlik və inkişafla nəticələndiyini nümunə göstərib.
Prezident İlham Əliyev Azərbaycanın Avropa İttifaqı ilə energetika, boru kəməri, nəqliyyat sahələrində strateji tərəfdaşı olmasına rəğmən , ölkəmizin Avropa ilə fərqli dəyərlər daşıyıcısı olmasına diqqət yetirərək, Avro- zonada baş verən böhranların, müsəlman mühacirlər və qaçqınlara qarşı ikili standartlara söykənən münasibətlərin fonunda Azərbaycanın ümumiyyətlə Avropaya inteqrasiyada deyil, əməkdaşlıqda maraqlı olmasının doğru olduğunu diqqətə çatdırıb.
Prezident İlham Əliyev Aİ ilə əməkdaşlıqla bağlı hal-hazırda Avropa Komissiyasında rəsmi Bakının Avropa Birliyi və Azərbaycan arasında əməkdaşlıq formatı haqqında təkliflərini müzakirə etdiyini və ölkəmizin Avropa İttifaqı və Avropa Şurası ilə sıx əməkdaşlıq etdiyini və ölkəmizin bu prosesin inkişafında daha da maraqlı olmasını qeyd edib. Beynəlxalq münasibətlərin inkişafına nümunələr kimi hal-hazırda dünyada aktual olan və qlobal –humanitar mövzuları əhatə edən Bakı Humanitar Forumunu, idman və mədəniyyətlərin çarpazlaşması tədbirləri olan “Formula-1” yarışını, Şahmat Olimpiadasının keçirilməsini və Roma Papasının ölkəmizə səfərini göstərib.
Prezident İlham Əliyevin daxili siyasətlə bağlı mesajlarının təhlili isə daha maraqlıdır.
Prezident nitqində 26 sentyabrda keçirilən Konstitusiyaya dəyişikliklər üzrə referendumu xatırladaraq , bu prosesin uğurla həyata keçdiyini , qərbin və beynəlxalq təşkilatların ölkəmizdə keçirilən referendumu müsbət qarşıladığını, buna misal olaraq isə referendumda iştirak edən xarici muşahidə missiyalarının referendum haqqında müsbət rəy verdiyini göstərib. Prezident xatırladıb ki , Avropa Şurası Parlament Assambleyasının müşahidə missiyası ölkəmizdə keçirilən son referenduma yüksək qiymət verib və inkişaf etmiş ölkələri Azərbaycan nümunəsini öyrənməyə çağırıb .
Həmçinin, Prezidentin nitqindən aydın oldu ki, referendum özü özlüyündə Azərbaycan hökumətinin keçirilməsini planlaşdırdığı , sosial , siyasi – iqtisadi , struktur sahəsində tətbiq ediləcək geniş islahatlar paketinin tərkib hissəsidir. O da artıq aydındır ki, Referendum konstitusiyaya tətbiq edilmiş son dəyişikliklərin hüquqi məntiqini – yeni qəbul olunmuş 7 illik prezidentlik müddətinin, prezidentin yeni səlahiyyətləri və məsuliyyətlərinin təsdiqlənməsi üçün ölkədə növbədən kənar prezident seçkilərinin keçirilməsini labud edir. Prezidentin mesajlarından anlaşıldı ki, yaxın aylarda növbədən kənar prezident seçkiləri və onun ardınca digər reformların şahidi olacağıq.
Konstitusiyaya tətbiq edilmiş dəyişikliklərə görə yeni yaradılacaq idarəetmə orqanı olan vitse-prezidentlik orqanının institutsional və səmərəli icra mexanizminin formalaşdırılması isə ölkədə struktur reformlarını labüd edir. Bu istiqamətdə son aylarda ard-ardına verdiyi fərman və sərəncamların səmərəli həyata keçirilməsi , konstitusiyaya edilmiş yeni dəyişikliklərə əsasən digər dövlət qurumlarına olduğu kimi, yaradılmış yeni şura və qurumların fəaliyyətin və onlara nəzarət funksiyası mexanizmləri də vitse-prezidentlik institutunun icra tabeliyində olacaqdır.
Prezidentin nitqinin mühüm hissəsi isə əlbəttə iqtisadiyyata aid idi. Prezident bildirdi ki , hökumət ölkədə qeyri – neft sektorunun xüsusi ilə , aqrar sənayenin inkişafında maraqlıdır və bu sahənin inkişafı qarşıdan gələn yeni il üçün prioritet sahədir .
Nəzərə alsaq ki , Azərbaycan hal-hazırda bir neçə qlobal institutlarının, məsələn BMT-nin Ərzaq və Kənd Təsərrüfatı Təşkilatının, kənd təsərrüfatının inkişafı sahəsində xüsusi maliyyə agentliyi olan İFAD-ın , Avropa İttifaqı ilə Avropa Qonşuluq Siyasəti çərçivəsində və Dünya Bankının dəstəyi ilə aqrar sahənin inkişafı və rəqabət qabiliyyətliliyi strategiyasına uyğun irimiqyaslı layihələr həyata keçirir , bu layihələr qeyri-neft sektorunun inkişafına töhvə verəcəkdir.
Yeganə Hacıyeva
Gənc Demokratlar İnstitutunun başqanı
