ABŞ prezidenti Donald Tramp transseksual idmançıların qadınların idman yarışlarında iştirakını qadağan edən sərəncam imzalayıb.
Gununsesi.info xarici mediaya istinadən xəbər verir ki, sərəncama əsasən, transseksual idmançıların qadınların idman yarışlarında iştirakına və ya qadınların paltardəyişmə otaqlarından istifadəsinə icazə verən təhsil müəssisələrinə federal hökumət tərəfindən maliyyə ayrılmayacaq.
Sərəncamda həmçinin dövlət qurumlarına gender əsaslı qadın idman kateqoriyalarını beynəlxalq təşkilatlarda təbliğ etmək və “qadın idmançıların maraqlarına uyğun ədalətli və təhlükəsiz siyasət”in təşviqi üçün əsas təşkilatların və idarəetmə orqanlarının nümayəndələrini bir araya gətirmək tapşırılıb.
“Biz hər məktəbə xəbərdarlıq edirik: Əgər kişilərin qadın idman komandalarında və ya paltardəyişmə otaqlarınızda olmasına icazə versəniz, 9-cu düzəlişi pozduğunuza görə araşdırılacaqsınız və federal vəsaitləriniz risk altında olacaq”, – deyə Tramp 1972-ci ildə təhsildə cinsi ayrı-seçkiliyi qadağan edən qanuna istinad edərək bildirib.
Qadınların idmanı ilə bağlı müharibəni bitirdiklərini ifadə edən Tramp, administrasiyasının “kişilərin qadın idmançıları təhqir etməsinə baxmayacağını” deyib.
“Biz bunun baş verməsinə heç vaxt icazə verməyəcəyik, bu, hazırda sona çatır” dedi Tramp.
Tramp həmçinin bildirib ki, idmanda transgenderlərin iştirakı məsələsini beynəlxalq idarəetmə orqanlarına buraxan Beynəlxalq Olimpiya Komitəsinə 2028-ci ildə Los-Ancelesdə keçiriləcək Yay Olimpiya Oyunları öncəsi gender əsaslı iştirakın açıq şəkildə təsdiqlənməsi üçün təzyiq göstərəcək.
Qeyd edək ki, Tramp yanvarın 20-də vəzifəyə gəldikdən sonra transseksualları hədəf alan dörd fərman imzalayıb.
Orxan Saffari
