ABŞ generalı həyacan təbili çalır

  • By admin
  • 16 Aprel 2024 14:03
 Konqres tezliklə Kiyevə daha çox silah və sursat göndərilməsini təsdiqləməyin bir yolunu tapmasa, həftələr içərisində Ukraynanın Rusiyaya qarşı silah gücü 1:10 nisbətinə düşəcək.
Gununsesi.info-nun ABŞ mediasına istinadən xəbərinə görə, bu barədə  ABŞ-nin Avropadakı qoşunlarının komandanı, ordu generalı Kristofer Kavoli ötən həftə Konqresə məruzəsində bildirib. 
Kavoli və müdafiə nazirinin beynəlxalq güvənlik məsələləri üzrə köməkçisi Selesta Uollanderin məruzəsi Konqresin Ukraynaya yardımın təsdiqlənməsi baxımından önəmli həftələrə qədəm qoyduğu dövrə təsadüf edir.

“Hazırda Rusiya tərəfinin silah sayı onların sayını beş dəfə ötür, yəni ruslar ukraynalılara onların cavab verə biləcəyindən beş dəfə çox top mərmisi atırlar. Bir neçə həftə içində bu say dərhal 10-a qalxacaq. Biz aylardan danışmırıq. Biz hipotetik danışmırıq”, – Kavolinin sözləridir.

Nümayəndələr Palatasının respublikaçı sədri Mayk Conson bu paketin qəbulunun yolunu tapmağa çalışır. Sözügedən qanun Ukraynaya daha çox silah-sursat verilməsi ilə yanaşı, bu silahları istehsal edən ABŞ şirkətlərinin ciddi qazanc əldə etməsi deməkdir. Conson bu qanunu Palatanın səsverməsinə çıxarmağa çalışır, ancaq daxili ehtiyacları, o cümlədən sərhəd güvənliyi məsələsini bəhanə gətirən konqres üzvlərinin dirənişi ilə üzləşir.

Kavoli millət vəkillərinə deyib ki, bu münaqişədə ABŞ-nin təchiz etdiyi 155 millimetrlik artilleriya mərmiləri həyati önəm daşıyıb: “Döyüş meydanında ən böyük qüvvə artilleriyadır. Çox münaqişələrdə belədir, bu münaqişədə isə dəqiq belədir. Ukraynanın mərmiləri bitərsə, biz göndərməyi dayandırdığımız üçün bitəcək, axı o mərmilərin əsas hissəsini biz göndəririk”.

Rusiyanın öz mərmi istehsalı artıb və ölkə bir neçə gündən bir irimiqyaslı hücumlar gerçəkləşdirə bilir. Kavoli deyib ki, Ukraynanın havadan müdafiə ehtiyatları tükənərsə və ABŞ onları önləyici təyyarələrlə təchiz etməzsə, “bu hücumlar Ukraynanın iqtisadiyyatını, mülki cəmiyyətini və ordusunu tam iflic edəcək”.

“The Associated Press” yazır ki, Konqres 60 milyard dollarlıq əlavə yardım paketinin təsdiqini ertələyəndən bəri Ukrayna silah-sursata qənaət etməyə başlayıb.
Afət Abbasova
Gununsesi.info