İlon Maskın rəhbərlik etdiyi Tesla bu yaxınlarda diqqətçəkən bir iş elanı dərc edib. Bu reklam təkcə səxavətli maaşı ilə deyil, həm də fiziki cəhətdən çətin şərtləri ilə diqqət çəkir.
Gununsesi.info xarici KİV- ə istinadən xəbər verir ki, Mask təkcə avtomobil sənayesində deyil, həm də robot texnikası sahəsində inqilab etmək məqsədini davam etdirərək, insanabənzər robot “Optimus”un inkişafına töhfə verə biləcək insanları axtarır.
Layihədə iştirak etmək üçün namizədlər sadəcə olaraq VR (“virtual reality”- virtual reallıq) eynək taxmalı və hərəkət sensoru kostyumu geyinməlidirlər. Bununla belə, bu işə müraciət etmək üçün fiziki tələb var: Belə ki, gələcəkdə işçilərin boyu 1m 70 ilə 1m 80 arasında olmalı və ağır şərtlərə tab gətirmək üçün fiziki qabiliyyətə malik olmalıdır.
Namizədlər çox ağır avadanlıqla oturmaq, bədəni qaldırmaq və bükmək kimi sadə və mürəkkəb hərəkətləri yerinə yetirməli olacaqlar. Tesla, həmçinin VR-dən davamlı istifadənin narahat edə biləcəyini və bəzi işçilər üçün ürək bulanmasına səbəb ola biləcəcyi haqqında xəbərdarlıq edib:
“Qeyd etmək vacibdir ki, VR qulaqlıqlarından istifadə və ya virtual mühitdə işləmək bəzi insanların istiqamət hissini itirməsinə və narahat hiss etməsinə səbəb ola bilər ki, bu da virtual reallıq xəstəliyinə səbəb ola bilər”, – deyə şirkət bildirib.
İş saatlarında çeviklik də mühüm tələbdir. İşçilərin gecələr, həftə sonları və iş vaxtından artıq işləməyə hazır olması gözlənilir. Bu çətin şərtlər ayda 6000 avroya çata bilən xeyli əməkhaqqı ilə kompensasiya edilir.
Tesla bu yaxınlarda gündəlik ev işlərində kömək edə, obyektləri hərəkət etdirə və manipulyasiya edə bilən çoxfunksiyalı robotunu təqdim etdi. Bu robotlardan bəziləri hazırda Teslanın Fremont fabrikində aktiv olaraq istifadə olunur. Bu, şirkətin robot texnikasını gələcəyinin ayrılmaz hissəsinə çevirmək öhdəliyini daha da vurğulayır. Robotun qiymətinin təxminən 22.000 avro olduğu təxmin edilir.
Günel Həsənova
