Ermənistan Avropa İttifaqına üzvlük üçün müraciət hazırlığı prosesinə başlayacaq.
Gununsesi.info xəbər verir ki, bunu Ermənistanın Baş naziri Nikol Paşinyan parlamentdə hökumətin 2026–2031-ci illər üzrə proqramını təqdim edərkən açıqlayıb.
Paşinyanın sözlərinə görə, Ermənistanın Aİ-yə üzvlük istiqamətində hazırlıq prosesi yaxın vaxtlarda başlayacaq.
Baş nazir bildirib ki, bu proses Ermənistanın Avrasiya İqtisadi İttifaqındakı tərəfdaşlarının xahişi əsasında da həyata keçiriləcək. Paşinyan Ermənistanın Avropa İttifaqı ilə yaxınlaşmasının Rusiyada narahatlıq doğurduğunu da qeyd edib.
Onun sözlərinə görə, bu narahatlığın əsas səbəbi Ermənistanın hazırda keçdiyi transformasiya prosesidir. Baş nazir bildirib ki, Ermənistanın xarici siyasətində müxtəlif istiqamətlər üzrə əlaqələrin inkişaf etdirilməsi ölkənin uzunmüddətli maraqları çərçivəsində həyata keçirilir.
Beləliklə, Ermənistan hökuməti Aİ ilə münasibətlərin daha da dərinləşdirilməsi istiqamətində yeni mərhələyə keçməyə hazırlaşır. Ölkənin hazırda həm Aİ, həm də Aİİ ilə münasibətlərini davam etdirməsi isə Yerevanın xarici siyasətində balans məsələsini yenidən gündəmə gətirir.
