İsrailin beynəlxalq ərazi sularında basqın edərək saxladığı Madleen gəmisində saxlanılan fəallardan biri Tiaqo Avila aclıq aksiyasına başlayıb.
Gununsesi.info xarici mediaya istinadən xəbər verir ki, İsrail ordusu Qəzza zolağındakı blokadanı yarmaq və məsələ ilə bağlı maarifləndirmək məqsədilə iyunun 1-də İtaliyadan yola düşən və müxtəlif millətlərdən 12 hüquq müdafiəçisini daşıyan “Madleen” gəmisinə basqın edib. Basqından sonra gəmi ilə əlaqə kəsilib və daha sonra gəmi Aşdod limanına aparılıb.
Səhər saatlarında 12 könüllüdən 4-ü deportasiya edildikdən sonra ölkədə qalan 8 fəal Ramledəki təcridxanada məhkəmə qarşısına çıxarılıb və dinləmələr 5 saatdan çox davam edib.
Madleen yelkənli gəmisində insan haqları müdafiəçilərini təmsil edən İsrail hüquq müdafiə təşkilatı Adalah İsrail tərəfindən saxlanılan Azadlıq Donanması könüllülərinin hazırkı vəziyyəti ilə bağlı bəyanat yayıb.
Braziliyalı fəal Tiaqo Avila gəmi saxlanılandan bəri aclıq aksiyasına başlayıb və aktivistlərin təcridxanada yataq böcəyi və yalnız içilməz kran suyuna çıxışı ilə qaldıqları bildirilir.
