Politoloq Turan Rzayev Prezident Administrasiyasının Xarici siyasət məsələləri şöbəsinin müdiri Hikmət Hacıyevin Türkiyənin “Haber Global” televiziya kanalına müsahibəsində səsləndirdiyi fikirləri şərh edib.
Gununsesi.info xəbər verir ki, politoloqun sözlərinə görə, Hikmət Hacıyevin Ermənistan Konstitusiyasında Azərbaycana və Türkiyəyə qarşı ərazi iddialarını ehtiva edən müddəaların çıxarılması ilə bağlı mesajı Azərbaycanın sülh prosesi üzrə dəyişməyən və prinsipial mövqeyinin növbəti dəfə açıq ifadəsidir.
Turan Rzayev bildirib ki, Bakı artıq məsələyə yalnız siyasi bəyanatlar prizmasından yanaşmır.
Onun fikrincə, Ermənistan regionda uzunmüddətli sülh istəyirsə, bunu ilk növbədə öz hüquqi bazasında nümayiş etdirməlidir.
Politoloq qeyd edib ki, Azərbaycanın Ermənistan Konstitusiyasındakı ərazi iddialarının aradan qaldırılmasını israrla tələb etməsi təsadüfi deyil. O, həmçinin vurğulayıb ki, hakimiyyətlər dəyişdikcə dövlətlərin xarici siyasəti dəyişə bilər, lakin konstitusiya dövlətin rəsmi hüquqi iradəsini əks etdirən əsas sənəddir.
“Ermənistan Konstitusiyasında Azərbaycana və Türkiyəyə qarşı dolayı və ya birbaşa ərazi iddiaları qaldığı müddətdə imzalanacaq istənilən sülh sazişi gələcəkdə hüquqi və siyasi risk daşımağa davam edəcək. Bir tərəfdən sülh sənədi imzalamaq, digər tərəfdən isə konstitusiyada qonşu dövlətlərə qarşı iddiaları saxlamaq bir-birinə zidd yanaşmadır”, – deyə Rzayev bildirib.
Onun sözlərinə görə, Hikmət Hacıyevin “ərazi iddiaları konstitusiyadan çıxarıldıqdan sonra Azərbaycan yekun sülh sazişinin imzalanması üçün problem görmür” fikri Bakının sülh prosesinə əlavə siyasi şərtlər irəli sürmədiyini göstərir.
Politoloq hesab edir ki, Azərbaycan konkret və hüquqi əsaslandırılmış tələb irəli sürür. “Əvvəlcə Ermənistan öz konstitusion ziddiyyətini aradan qaldırmalıdır. Bundan sonra sülh sazişinin imzalanması üçün siyasi maneə qalmayacaq. Bakı üçün əsas məsələ sənədin imzalanması deyil, onun gələcəkdə davamlı və etibarlı olmasının təmin edilməsidir”, – deyə o əlavə edib.
Orxan
