Kostromadakı gecə klubunda baş verən yanğında günahlandırılan şəxsin kimliyi məlum olub.
Həmin şəxs 23 yaşlı Stanislav İonkindir. O, müştərilərlə mübahisə edib və tavana ovda istifadə olunan siqnal qurğusundan (fişəng) atəş açdıqdan sonra qaçıb.
Polis onu hadisə yerindən 6 km aralıda saxlayıb.
Klubun qonaqlarına qeyri-qanuni spirtli içkilərin satıldığı da məlum olub. Məhsulların müvafiq lisenziyalarının müddəti altı il əvvəl başa çatıbmış.
Üstəlik, son üç ildə Fövqəladə Hallar Nazirliyi klubda yanğın təhlükəsizliyi ilə bağlı yoxlama keçirməyib.
13:37
Rusiyanın Kostroma şəhərində gecə klubunda baş verən yanğın 15 nəfərin həyatına son qoyub. 60-dan çox xəsarət alan var. Yanğın zamanı binada 200-dən çox adam olub.
Hadisəni törətməkdə şübhəli bilinən şəxs artıq saxlanılıb.
Yanğından sonra insanlar həmin gecə klubunda olan qohumlarını axtarırlar. Onların telefonlarına zəng çatmır.
Kostroma sakini deyir: “Üç nəfəri itirmişik, onlar bizim qohumlarımızdır. İndi şəhər xaos içindədir. Çoxlu itkin düşən insan var. Heç kim məlumat vermir. Ölən və yaralananların siyahısı yoxdur. İki xəstəxanaya getdik, orada bizim adamlar tapılmadılar. Onları harada axtaracağımızı bilmirik. Morqlara da getdik, tapmadıq”.
Sakinlərin dediklərinə görə, “Poliqon” şəhərin təxminən 20 il əvvəl tikilən ən böyük və ən qədim gecə klubu hesab edilir.
Kostroma vilayət dumasının deputatı, “Poliqon” kafesinin sahibi İxtiyar Mirzəyev doğmaları və yaxınları yanğında həlak olan ailələrə maddi yardım edəcək.
“Həlak olanların ailələrinə və yaxınlarına bütün lazımi yardımı göstərəcəyəm. Ailələrə həm maddi, həm də təşkilati dəstək verəcəyəm”, – onun Kostroma vilayət qubernatorunun mətbuat xidməti tərəfindən yayılan bəyanatında deyilir.
Mirzəyev yanğın zamanı həlak olanların yaxınlarına başsağlığı verib.
“Mən əməkdaşlarıma istintaq orqanlarına hər cür köməklik göstərməyi tapşırmışam”, – deyə o vurğulayıb.
10:46
Ölümlə nəticələnən yanğının baş verdiyi Kostromadakı kafe vilayət dumasının deputatı və “Vahid Rusiya” fraksiyasının üzvü İxtiyar Mirzəyevə məxsusdur.
O, 1969-cu ildə Yardımlı rayonunun Ostayır kəndində doğulub.
Pirotexniki vasitədən istifadə edən şəxs barəsində cinayət işi başladılıb.
Qeyd edək ki, faciə nəticəsində həlak olanların sayı artıq 15 nəfərə çatıb.
10:14
Rusiyanın Kostroma şəhərində “Poliqon” kafesində yanğında həlak olanların sayı artıb.
Bu barədə Fövqəladə Hallar Xidməti məlumat yayıb.
Faciə nəticəsində ölənlərin sayı 13 nəfərə çatıb.
09:34
Rusiyanın Kostroma şəhərində yanğında həlak olanların sayı artıb.
Bu barədə Kostroma Vilayət Prokurorluğunun nümayəndəsi məlumat verib.
Yanğın zamanı ölənlərin sayı yeddiyə çatıb.
Yanğına pirotexniki vasitələrdən istifadə səbəb olub.
08:32
Rusiyanın Kostroma şəhərində “Poliqon” kafesində baş verən yanğında 5 nəfər ölüb.
Bu barədə Rusiya Fövqəladə Hallar Nazirliyinin mətbuat xidmətindən məlumat verilib.
Daha dörd nəfərin yaralandığı bildirilir.
Həmçinin 3,5 min kvadratmetr sahədə dam örtüyü uçub. 250 nəfər ərazidən təxliyə olunub.
Gununsesi.info
