13 yaşından Google-da işləməyə başlayan və dahi adlandırılan Stanley Zhong yüksək nəticələrinə baxmayaraq, 16 universitetdən rədd edilib. Səbəbinin ayrı-seçkilik olduğunu iddia edən ailə bu universitetləri məhkəməyə verməyə hazırlaşır.
Gununsesi.info sözcü.com.tr-yə istinadən xəbər verir ki, ABŞ-də yaşayan 19 yaşlı asiyalı Stanley Zhong orta məktəbi bitirdikdən sonra 16 universitetə müraciət etsə də, qəbul olunmayıb. Qiymətlərinin yüksək olmasına baxmayaraq, irqçilik səbəbilə universitetə qəbul olunmadığını iddia edən Stanley və ailəsi bu universitetləri məhkəməyə verəcək.
Cəmi 13 yaşı olmasına və əla akademik nailiyyətlərə malik olmasına baxmayaraq, Google tərəfindən işə götürülən Stanley UC Berkeley, UCLA və Michigan Universiteti kimi məktəblərə qəbul oluna bilməyib.
Zhong ailəsi, xüsusən də Asiya əsilli Amerikalı tələbələrin universitetə müraciətlərində onlara qarşı ədalətsiz davranıldığını deyib:
“Kaliforniyadakı universitetlərə 1996-cı ildən etibarən irqi qəbul meyarı kimi istifadə edilməsinin qadağan edilməsinə baxmayaraq, sistem bunu davam etdirir”, – deyə ailə bildirib.
Ata və oğul təhsil sistemində ayrı-seçkiliyə qarşı mübarizə aparmaq istədiklərini bildirərək, digər Asiya əsilli Amerikalı tələbələrin də oxşar problemlər yaşadıqlarını qeyd ediblər.
Kaliforniya Universiteti və digər işi məhkəmədə olan məktəblər irqi ayrı-seçkilik iddialarını rədd edir və qəbul siyasətlərinin qanunauyğun olduğunu vurğulayıblar. Zhong ailəsi isə təzminat tələb edir.
Günel Həsənova
