Azərbaycan Yazıçılar Birliyi (AYB) bir qrup şair və yazıçı barədə hüquq-mühafizə orqanlarına müraciət edəcək.
Gununsesi.info xəbər verir ki, bu barədə mediada məlumat yayılıb.
“Azərbaycan Yazıçılar Birliyinə hücum kampaniyası davam edir, vaxtaşırı qızışdırılır, bəzi saytlarda və elektron resurslarda əsassız, heç bir real fakta söykənməyən informasiyalar tirajlanır və bütün bu baş verənlərin arxasında Azərbaycan ədəbiyyatının və dilinin, mənəviyyatının heysiyyətini qoruyan, yazıçı və şairlərimizin ən qocaman peşəkar ocağı olan təşkilatı hörmətdən salmaq kimi məkrli niyyət dayanır”, – məlumatda qeyd olunub.
Bildirilib ki, AYB Katibliyi bu işlərin və bu kampaniyanın “qədim və yeni təşkilatçıları” barədə yetərincə məlumatlıdır:
“Rəsmi olaraq bildiririk ki, onun sıralarını könüllü olaraq tərk etmiş adamlar zamanında bunu ədəbiyyata və ədəbi prosesə baxış fərqləri ilə izah etmişlər. Birliyin katibliyinin qərarı ilə üzvlükdən xaric olunanlarla bağlı isə zamanında tərəfimizdən açıqlama verilmişdir və biz yenidən bu məsələlərə qayıtmaq niyyətində deyilik”.
AYB Aqşin Yenisey də daxil olmaqla bir çox yazıçının qurum haqqında yazdığı fikrlərə cavab verib.
“Amma aydınlıq olsun deyə qısaca bir neçə şeyi söyləməyi lazım bilirik. Adları hallandırılan ədiblərin sırasında Aqşin Yenisey kimi elə şəxslər də var ki, onlar heç vaxt birliyin üzvü olmayıblar. Guya həbsdə dünyasını dəyişmiş, Yardımlıdan olan Azad adlı AYB üzvü barədə məlumatlar yalandır. Saday Şəkərli ilə AYB arasında hər hansı məhkəmə çəkişməsi olmamışdır. Ramiq Muxtar və İlham Qəhrəman AYB-yə böhtan atdığına görə onlarla münasibətlər hüquq müstəvisində həll olunmuş, məhkəmənin hökmü ilə onların hər ikisi barədə cərimə tətbiq edilmişdir. Fəzail İsmayıl AYB aparatının işçilərinə şər atmış, əsassız fikirlərini sübuta yetirə bilmədiyinə görə üzvlükdən xaric edilmişdir.
Bildiririk ki, AYB üzvlüyünü tərk etmiş və yenidən birlik sıralarına qoşulmaq istəyən ədiblər də olmuşdur ki, AYB rəhbərliyi belə müraciətlərə daim humanist yanaşmışdır”.
AYB bir qrup şair və yazıçıya xəbərdarlıq edib:
“Birlik haqqında, onun rəhbərliyi və məsul işçiləri barədə qarayaxma kampaniyası aparan şəxslərin diqqətinə çatdırırıq ki, onların həm keçmiş, həm indiki şər əməlləri ilə bağlı tərəfimizdən yaxın vaxtlarda hüquq-mühafizə orqanlarına müraciət ediləcək”.
Məsələ ilə bağlı yazıçılar da münasibət bildirib.
Yazıçı Vüqar Van Gununsesi.info-ya bildirib ki, bu, doğru yanaşma deyil:
“Ümumiyyətlə, söhbət hansı böhtandan gedirsə, məlum deyil. Ancaq yazıçılar oranı tənqid edir deyə məhkəməyə verirlərsə, daha deyiləcək söz yoxdur. Ancaq gözlənilən bir haldır”.
Yayılan məlumatda adıçəkilən İlham Qəhrəman isə bu barədə deyib:
“Allah baş qatanın başını qatsın. Bir ildir ki, məhkəməylə bağlı keçirdiyim əsəb və stressdən yana içimin yaradıcı konstruksiyası dağılmışdı. Təzə-təzə özümə gəlib içimi bərpa edirəm. İndi bunların bəyanatını gördüm. Deyir, oğru elə bağırdı doğrunun bağrı yarıldı. Jurnalist soruşur ki, evi hansı meyarla verirsiz, cavab verir ki, kim yaxşı inandıra bilsə, ona ev veririk. Bu meyarla şəhərdə və şəhər ətrafında 3 villası olan şəxsə ev verir, üstəlik də bizə xox gəlir. Demək, bunun qəsdi ətrafındakıları bütün yaradıcı şair və yazıçılarla üz-üzə qoymaqdır. Allah axırın xeyirə calasın!”
Yazıçı Orxan Həsəni isə məsələyə belə yanaşıb:
“Qələm adamlarının bir-birini məhkməyə verməsini düzgün hesab etmirəm. Şər atmaq və qarayaxma aparmaq isə ədəbiyyat adamına yaraşmaz. Mühitimiz o qədər böyük deyil, hamı bir-birini tanıyır, problemi məhkəmə salonlarında yox, çay süfrəsi arxasında həll etmək lazımdır”.
Qeyd edək ki, sorğuya bir sıra AYB üzvü olan yazıçılar münasibət bildirmək istəməyib.
Orxan
