Böyük Britaniyanın İnvestisiya üzrə dövlət naziri Lord Ceyson Stokvud Azərbaycanla iqtisadi və investisiya əlaqələrinin inkişafı məqsədilə Bakıya səfər edib.
Gununsesi.info xəbər verir ki, səfər çərçivəsində nazir Azərbaycanın dövlət və özəl sektor nümayəndələri ilə bir sıra yüksək səviyyəli görüşlər keçirib.
Görüşlərdə investisiya, maliyyə əməkdaşlığı, təmiz enerji, infrastruktur və maliyyə xidmətləri sahələrində yeni imkanlar müzakirə olunub.
Lord Stokvud səfər zamanı Azərbaycan Dövlət Neft Fondu, Bakı Fond Birjası və Azərbaycan Respublikasının İqtisadiyyat Nazirliyi ilə görüşlər keçirərək iki ölkə arasında investisiya və maliyyə əməkdaşlığının genişləndirilməsi perspektivlərini müzakirə edib.
Nazir bildirib ki, Böyük Britaniya və Azərbaycan arasında uzunmüddətli və etibarlı tərəfdaşlıq mövcuddur.
Onun sözlərinə görə, Böyük Britaniya Azərbaycanın ən böyük xarici investorlarından biri olmaqla yanaşı, ticarət və iqtisadi əlaqələrin daha da genişləndirilməsində maraqlıdır.
“Strateji tərəfdaşlığımız çərçivəsində təmiz enerji, maliyyə xidmətləri və infrastruktur sahələrində əməkdaşlığı gücləndirməyi, qarşılıqlı ticarət və investisiyaları artırmağı hədəfləyirik. Bu isə hər iki ölkədə yeni iş yerlərinin və iqtisadi imkanların yaranmasına töhfə verəcək”, – deyə Lord Stokvud qeyd edib.
Səfər həmçinin Böyük Britaniya və Azərbaycan arasında iqtisadi əməkdaşlığın əsas müzakirə platformalarından biri olan Birgə Hökumətlərarası Komissiyanın 8-ci iclasına hazırlıq mərhələsində həyata keçirilib.
Qeyd edək ki, bu səfər iki ölkə arasında strateji tərəfdaşlığın inkişafına yönəlmiş yüksək səviyyəli təmasların davamı kimi qiymətləndirilir və iqtisadi münasibətlərin yeni mərhələyə keçidini nümayiş etdirir.
