İsrailli jurnalist Eyal Berkoviç televiziya verilişində Türkiyəni hədəf alan qalmaqallı açıqlamalar verib. Gərginliyi futbol matçına bənzədən Berkoviç “Türkiyə finaldadır” sözləri ilə reaksiyaya səbəb olub.
Gununsesi.info Türkiyə mediasına istinadən xəbər verir ki, İsrail və İran arasında davam edən qarşıdurma altıncı gününə girdiyi bir vaxtda, Tel-Əvivdə yerləşən bir televiziya kanalında Türkiyəni hədəf alan təəccüblü açıqlama gündəmə gəlib.
İsrailin Kanal 13 televiziyasında yayımlanan proqramda danışan jurnalist Eyal Berkoviç Türkiyəni hədəf alan açıqlamalar verib. Proqram zamanı Berkoviç “Növbəti Türkiyədir” deyib.
Sözlərini zarafatcıl şəkildə təqdim etməyə çalışan Berkoviç hadisələri futbol turniri ilə müqayisə edib:
“Qulaq as, zarafat etdim. 1/4 finalda HƏMAS la bərabərə qaldıq, penaltilərlə qalib gəldik. Sonra yarımfinalda İrana qalib gəldik. Türkiyə isə finaldadır”.
Bu bəyanatlar qısa zamanda sosial mediada böyük əks-səda doğurdu və jurnalistin açıqlaması Türkiyəyə qarşı açıq təhdid və təxribat kimi qiymətləndirilib.
Günel Həsənova
