Azərbaycan estrada musiqisinin banilərindən olan mərhum Xalq artisti Mirzə Babayevin nəvəsinin tutulması ilə əlaqədar Avropa Məhkəməsində kommunikasiya başlayıb.
Gununsesi.info xəbər verir ki, Emin Babayev iki gün polis bölməsində saxlanması, daha sonra polisə müqavimət ittihamı ilə 200 manat cərimələnməsilə əlaqədar Avropa Məhkəməsinə şikayət edib. O, Avropa İnsan Haqları Konvensiyasının 5 (azadlıq hüququ), 6 (ədalətli məhkəmə araşdırması) və 13-cü (səmərəli hüquqi müdafiə vasitələri) maddələrinin pozulduğunu iddia edib. Onun şikayəti əsasında Avropa Məhkəməsi Azərbaycan hökumətinə suallar göndərib və cavablandırılması istənilib.
Emin Babayev ərizəsində göstərib ki, 2019-cu il mayın 4-də saxlanılıb. Həmin vaxt REAL hərəkatının üzvü olan Emin Babayev küçədə söyüş söyməkdə və onu intizama dəvət edən polisin əmrinə tabe olmamaqda ittiham edilib, haqqında inzibati xəta protokolu tərtib edilib. Eyni gündə də Səbail Rayon Məhkəməsinə aparılıb. Hakim məhkəməni mayın 6-na qədər təxirə salıb. Emin Babayevin ərizəsində yazdığına görə, məhkəmə onu növbəti iclıasa qədər evə buraxsa da, yenə də Səbail rayonu, 8-ci polis bölməsinə qaytarılıb, mayın 6-na qədər orada saxlanılıb. Mayın 6-da keçirilən məhkəmədə isə onun 200 manat cərimələnməsi haqda qərar çıxarılıb.
Emin Babayev qeyd edib ki, saxlandığı müddətdə özünün seçdiyi vəkillə görüşməsinə imkan verilməyib. O, təqsirli bilinməsi və 200 manat cərimələnməsi barədə qərarın da əsassız olduğunu göstərib. Əlavə edib ki, məhkəmə yalnız protokolları tərtib edən polisləri dindirib, onların dedikləri ilə əsassız qərar çıxarıb.
O zaman Emin Babayev bu qərardan apellyasiya şikayəti verib, lakin təmin olunmayıb. Həmçinin polis bölməsində 48 saat qanunsuz saxlandığını iddia edərək, bundan da ayrıca şikayət verib. Bu şikayəti də rədd edilib. Bununla bağlı məhkəmə qərarında göstərilib ki, polisin əmrinə tabe olmama ittihamı ilə məsuliyyətə cəlb edilən şəxs 48 saata qədər saxlanıla bilər.
Firuzə Mahmudova
