Rusiya Prezidentinin mətbuat katibi Dmitri Peskovun qızı Yelizaveta Peskova ona qarşı tətbiq edilən sanksiyaları “əsassız və ədalətsiz” hesab edir.
Gununsesi.info xəbər verir ki, o, bu barədə “Business Insider”ə bildirib.
24 yaşlı Yelizaveta Peskova rabitə firmasının qurucusu və tarixi fondun direktorudur, beynəlxalq əlaqələr üzrə magistr dərəcəsinə malikdir – onun dissertasiyası türk və iranlı lobbiçilərin ABŞ-ın xarici siyasətinin istiqamətinə təsirindən bəhs edir.
Onun İnstaqram səhifəsindəki paylaşımları ən azı dolanışığını təmin etmək üçün mübarizə aparmadığını göstərir. Peskovanın sosial şəbəkə səhifələri onun lüks həyatını əks etdirən foto və videolarla doludur.
“Mən başa düşürəm ki, başqalarından daha çox imkanlarım var, çünki təbii ki, mən sadə bir ailədən deyiləm. Ancaq bilirsiniz ki, ağıl olmadan bu imkanları nəyəsə çevirə bilməzsiniz” – Peskova sanksiyalara etirazını belə ifadə edib.
ABŞ-a görə, Yelizaveta ailəsinin hakimiyyətlə əlaqələrindən qazanc əldə edib. Ona qarşı sanksiyaların rəsmi elanında qeyd olunur ki, Yelizavetanın dəbdəbəli həyat tərzini nümayiş etdirdiyi sosial mediada on minlərlə izləyicisi var.
Onun və ya atasının nə qədər pulunun olduğu bəlli deyil. Lakin 2019-cu ildə “The Guardian” Dmitri Peskovun həyat yoldaşının 10 milyon dollardan çox dəyərində daşınmaz əmlaka sahib olduğunu yazıb.
Yelizaveta Peskova “Insider”ə sanksiyalardan və xüsusən də “müharibəyə şərait yaratmaq” ittihamından narahat olduğunu bildirib: “Mənim üçün bu, tamamilə ədalətsiz və əsassızdır. Həqiqətən təəccübləndim, çünki 24 yaşı olan və vəziyyətlə heç bir əlaqəsi olmayan birinə qarşı sanksiyaların tətbiqi qəribədir”.
Yelizaveta sanksiyaların ona maliyyə cəhətdən təsir etməyəcəyini deyib. O bildirib ki, baxmayaraq ki, digər ruslar kimi, o, daha geniş sanksiyaların təsirini və ölkənin qlobal maliyyə sistemindən təcrid olunmasının təsirini hiss edir, lakin bu, Nyu-York şəhəri kimi yerlərə daha səfərlərin olmayacağı anlamına gəlir.
“Mən əsəbiləşirəm, çünki səyahət etmək istəyirəm və fərqli mədəniyyətləri sevirəm. Mən dünya vətəndaşıyam” – Dmitri Peskovun qızı qeyd edib.
Peskova Rusiyanın Ukraynada apardığı müharibəni müzakirə etməkdən imtina edib və bildirib ki, “atamla çox dərin əlaqəm olsa da, o, müharibəyə görə məsuliyyət daşımamalıdır”.
Gununsesi.info
