Tofiq Yaqublu şahidlərə: - Bu qədər yalan danışmaq olarmı?!'

Müxalifət liderlərindən biri olan Tofiq Yaqublunun sonuncu məhkəmə prosesində də qalmaqal yaşanıb.

Gununsesi.info-nun xəbərinə görə, məhkəmədə Yaqublunun yaxınlarının, eləcə də jurnalistlərin iştirakı təmin olunmayıb.

Çıxış edən Tofiq Yaqublu hakimdən “Məhkəmə prosesində yaxınlarımın, jurnalistlərin və siyasi partiya rəhbərlərinin iştirakını təmin edin” tələbini irəli sürüb.

“Nazirlər Kabinetin qərarı Konstitusiyadan üstün deyil və yaxınlarım gəlib prosesdə iştirak edə bilərlər”, müxalifətçi deyib.

Proses iştirakçılarının deməsinə görə, daha sonra məhkəmə prosesində şahid qismində Baş Dövlət Yol Polis İdarəsinin Nizami rayonu üzrə inspektoru Malik Manafov dindirilib. O, proses zamanı istintaqa verdiyi ifadələrini təsdiqlədiyini bildirib, amma bəzi suallara cavab verə bilməyib.

Müdafiə tərəfinin vəkilləri M.Manafovdan telefon nömrəsini təqdim etməsini istəsələr də, şahid imtina edib. Vəkillər istəklərini şahidin nömrəsi ilə bağlı vəsatət verəcəkləri ilə izah ediblər. Onlar deyiblər ki, M.Manafovun telefon nömrəsini mobil operatora göndərərək hadisə günü şəxsin anten məlumatlarını əldə etmək vacibdir. Vəkillərin bununla bağlı vəsatəti qəbul edilməyib.