Respublika Neyrocərrahiyyə Xəstəxanasında vətəndaşların həkim qəbuluna yazılması üçün onlayn növbə sisteminin tətbiqi nəzərdə tutulur.
Gununsesi.info xəbər verir ki, TƏBİB-in tabeliyində fəaliyyət göstərən tibb müəssisələrində tətbiq olunan onlayn növbə sistemi mərhələli şəkildə genişləndirilir və Respublika Neyrocərrahiyyə Xəstəxanasının da bu sistemə qoşulması planlaşdırılır.
Onlayn növbə sistemi vasitəsilə vətəndaşlar xəstəxanaya getmədən əvvəl həkim qəbuluna elektron qaydada yazıla biləcəklər.
Sistem “mygov” platforması üzərindən fəaliyyət göstərir. Rəsmi məlumatlara əsasən, vətəndaş “mygov”da növbənin kim üçün götürüləcəyini, həkim ixtisasını, tibb müəssisəsini, həkimi, tarixi və uyğun saatı seçərək növbəni təsdiqləyə bilir. Xidmət ödənişsizdir.
TƏBİB-in 30 sentyabr 2026-cı il tarixli açıqlamasında da bildirilib ki, TƏBİB-in tabeliyində fəaliyyət göstərən tibb müəssisələrində həkim qəbuluna onlayn növbənin əldə edilməsi üçün ödəniş tələb olunmur və onlayn növbə yalnız “mygov” mobil tətbiqi vasitəsilə əldə edilə bilər.
Qeyd edək ki, onlayn növbə sistemi artıq bir sıra tibb müəssisələrində tətbiq edilir. Son olaraq Mərkəzi Neftçilər Xəstəxanasının sistemə qoşulması tamamlanıb. Hazırda həmin xəstəxanada 11 ixtisas üzrə həkim qəbuluna onlayn növbə götürmək mümkündür.
Yeni sistemin tətbiqi ilə vətəndaşların xəstəxanalarda növbə gözləməsinin azaldılması, pasiyent axınının daha səmərəli idarə olunması və həkim qəbulunun əvvəlcədən planlaşdırılması məqsəd qoyulur.
Beləliklə, Respublika Neyrocərrahiyyə Xəstəxanasında da onlayn növbə sisteminin tətbiqi vətəndaşların həkim qəbuluna daha rahat şəkildə yazılmasına imkan yaradacaq.
