Avropa İttifaqının Ali nümayəndəsi Kaja Kallas din və ya etiqad zəminində törədilən zorakılıq aktlarının qurbanlarının Beynəlxalq Anım Günü ilə bağlı bəyanat verib.
Gununsesi.info həmin bəyanatı təqdim edir:
“Avropa İttifaqı adından Ali Nümayəndənin bəyanatı”
“Bütün insanların düşüncə, vicdan, din və ya etiqad azadlığı hüququ vardır. Bu hüquq Ümumdünya İnsan Hüquqları Bəyannaməsində təsbit olunub. Lakin dünya əhalisinin təxminən üçdə ikisi bu hüququn ciddi şəkildə pozulduğu və ona qarşı ağır sui-istifadə hallarının baş verdiyi ölkələrdə yaşayır. Milyonlarla insan öz dini və ya etiqadı, yaxud hər hansı dinə və ya etiqada malik olmaması səbəbindən hər gün dözümsüzlük, ayrı-seçkilik, nifrət, düşmənçilik və zorakılıqla üzləşir. Bir çox insan isə bunun nəticəsində həyatını itirir.
Avropa İttifaqı Avropanın mədəni, dini və humanist irsindən ilham alır. Məhz bu irsdən insanın toxunulmaz və ayrılmaz hüquqları kimi universal dəyərlər formalaşıb. Avropa İttifaqı və onun üzv dövlətləri hər kəsin, dünyanın hər yerində din və ya etiqad azadlığı hüququnu təşviq edir. Biz vətəndaş cəmiyyəti, o cümlədən kilsələr, dini birliklər və icmalar, fəlsəfi və qeyri-konfessional təşkilatlar, eləcə də beynəlxalq tərəfdaşlarımızla birlikdə bu hüququ həm öz ölkələrimizdə, həm də xaricdə müdafiə etmək üçün ardıcıl və israrlı şəkildə çalışırıq.
Avropa İttifaqı daxilində həyata keçirdiyimiz siyasət antisemitizm və müsəlmanlara qarşı nifrətlə mübarizəyə yönəlmiş xüsusi təşəbbüsləri də əhatə edir. Biz bu kimi halların harada baş verməsindən asılı olmayaraq onları qətiyyətlə pisləyirik. Eyni zamanda, xristianlara və digər dini icmaların üzvlərinə qarşı ayrı-seçkilik və zorakılığı da pisləyirik.
Beynəlxalq səviyyədə biz Birləşmiş Millətlər Təşkilatında din və ya etiqad azadlığı hüququ ilə bağlı qətnamələr irəli sürməklə və BMT-nin İnsan Hüquqları üzrə Ali Komissarlığının bu istiqamətdə fəaliyyətini dəstəkləməklə fəal mövqe nümayiş etdiririk. Digər regionlarda isə, digər təşəbbüslərlə yanaşı, Asiyada din və ya etiqad azadlığının təşviqi məqsədilə vətəndaş cəmiyyətinin və müvafiq institutların gücləndirilməsinə, Sahel regionunda dini ayrı-seçkiliyə qarşı dialoq və sülhün təşviqinə yönəlmiş layihələri maliyyələşdiririk. Həmçinin tərəfdaşlarımızla birlikdə müxtəlif dinlərin dinc yanaşı yaşamasını təşviq etmək istiqamətində fəaliyyət göstəririk.
Bu il Avropa Komissiyası üçüncü ölkələrlə əlaqələr qurmaq və din və ya etiqad zəminində ayrı-seçkilik və təqiblərlə bağlı qlobal məlumatlılığı artırmaq məqsədilə Din və ya Etiqad Azadlığının Təşviqi üzrə yeni Xüsusi Nümayəndə təyin edib.
Bu beynəlxalq gündə biz din və ya etiqadı sərbəst şəkildə seçdiyinə, dəyişdirdiyinə və ya ondan imtina etdiyinə, hər hansı dini icmaya mənsub olduğuna və ya belə bir icmanın üzvü kimi qəbul edildiyinə, yaxud heç bir dinə və ya etiqada malik olmadığına görə ayrı-seçkiliyə, düşmənçiliyə və zorakılığa məruz qalan insanların xatirəsini ehtiramla yad edirik.
Biz bütün dövlətləri din və ya etiqad zəminində ayrı-seçkilik və zorakılığa qarşı tədbirlər görməyə, bu fundamental insan hüququna hörmət etməyə, onu qorumağa və təmin etməyə çağırırıq. Bu, həmçinin dindən dönməni cinayət əməli kimi qiymətləndirməmək və küfr haqqında qanunlardan sui-istifadəyə yol verməmək deməkdir.
Nə qədər ki, ayrı-seçkilik və zorakılıq davam edir, biz konstruktiv şəkildə fəaliyyət göstərməli və dinindən və ya etiqadından asılı olmayaraq bütün insanların azadlıq, hörmət, tolerantlıq və sülh şəraitində yaşamasının istisna deyil, norma olduğu bir dünyanın yaradılması naminə fəal şəkildə çalışmağa davam etməliyik”.
