12 may 2026-cı il tarixində Azərbaycan Respublikası Daxili İşlər Nazirliyi (DİN) yanında İctimai Şuranın təşəbbüsü və Nazirliyin birgə təşkilatçılığı ilə “Təhlükəsizlik və şəhərsalmanın müasir çağırışları” mövzusunda ictimai müzakirə keçirilib.
Gununsesi.info-nun xəbərinə görə, tədbir Prezident İlham Əliyevin 2026-cı ili “Şəhərsalma və Memarlıq İli” elan etməsi və 17–22 may tarixlərində keçiriləcək BMT-nin Ümumdünya Şəhərsalma Forumunun On Üçüncü Sessiyası (WUF13) çərçivəsində təşkil olunub.
DİN-in “Xəzri” İstirahət və Sağlamlıq Mərkəzində baş tutan tədbirdə dövlət qurumlarının nümayəndələri, DİN yanında İctimai Şura üzvləri, QHT və akademik dairələrin təmsilçiləri iştirak ediblər.
Müzakirələrin məqsədi urbanizasiya, nəqliyyat yüklənməsi, texnoloji inkişaf, ekoloji risklər və fövqəladə hallara hazırlıq fonunda şəhər təhlükəsizliyinə kompleks yanaşmanın formalaşdırılması, dövlət və ictimai institutlar arasında əməkdaşlığın gücləndirilməsi olub.
Tədbirdə çıxış edən DİN yanında İctimai Şuranın sədri Əliməmməd Nuriyev, QHT-lərə Dövlət Dəstəyi Agentliyinin İdarə Heyətinin sədri Aygün Əliyeva və Dövlət Şəhərsalma və Arxitektura Komitəsinin sədr müavini İlqar İsbatov təhlükəsiz şəhər mühitinin yaradılması, müasir şəhərsalma standartları və ictimai iştirakçılığın əhəmiyyətindən danışıblar.
Qeyd olunub ki, WUF13 Azərbaycanın şəhər təhlükəsizliyi və dayanıqlı şəhərsalma sahəsindəki təcrübəsinin beynəlxalq səviyyədə təqdim olunması üçün mühüm platformadır. Həmçinin forum çərçivəsində ilk dəfə QHT Forumu keçiriləcək, Qlobal Cənub QHT Forumu və QHT Agentliyinin pavilyonu vətəndaş cəmiyyəti nümayəndələrinin istifadəsinə veriləcək.
Polis Akademiyasının müəllimi, polis polkovniki Vaqif Abışov “reaktiv” modeldən “proaktiv” polis modelinə keçid, CPTED metodunun tətbiqi və “Təhlükəsiz şəhər” sistemində süni intellektin rolu barədə məlumat verib. Azərbaycan Milli QHT Forumunun İdarə Heyətinin üzvü Zaur İbrahimli isə şəhərsalma prosesində ictimai iştirakçılıq və ictimai nəzarət mexanizmlərindən bəhs edib.
Sual-cavab sessiyasında iştirakçılar şəhər infrastrukturunun təhlükəsizlik tələblərinə uyğunlaşdırılması ilə bağlı təkliflərini səsləndiriblər.
Sonda bildirilib ki, tədbirdə irəli sürülən təkliflər ümumiləşdirilərək aidiyyəti dövlət qurumlarına təqdim olunacaq və şəhərsalma sahəsində ictimai dialoqun genişləndirilməsi istiqamətində fəaliyyət davam etdiriləcək.
