İsrailin Baş naziri Binyamin Netanyahu Hizbullahın hücumlarına qarşı sərt cavab veriləcəyini və İsrail qoşunlarının Livanın cənubundan geri çəkilməyəcəyini bəyan edib.
Gununsesi.info xəbər verir ki, bu barədə Netanyahu İsrail müdafiə naziri İsrael Katz və Baş Qərargah rəisi Eyal Zamirlə keçirdiyi təhlükəsizlik müşavirəsindən sonra açıqlama verib.
Baş nazir bildirib ki, İsrail əsgərlərinə və ölkə ərazisinə yönələn hücumlara dözməyəcək.
“Mesajım çox aydındır: İsrail əsgərlərimizə və ya ərazimizə edilən hücumlara dözməyəcək və Hizbullahı bu hücumlara görə çox yüksək qiymət ödəməyə məcbur edəcəyik. İsrail Müdafiə Qüvvələri qüvvələrimizə və ərazimizə qarşı hər hansı təhdidin qarşısını almaq üçün tədbirlər görəcək”, – deyə Netanyahu vurğulayıb.
O əlavə edib ki, İsrailin şimal yaşayış məntəqələrinin təhlükəsizliyini təmin etmək məqsədilə ordu lazım olduğu müddətdə Livanın cənubundakı təhlükəsizlik zonasında qalacaq.
Netanyahunun sözlərinə görə, ötən gecə və səhər saatlarında Livana endirilən zərbələr Hizbullahın İsrail tank heyətinə hücumuna cavab olub. Həmin hücum nəticəsində polkovnik rütbəli batalyon komandiri də daxil olmaqla dörd israilli hərbçi həlak olub.
Baş nazir qeyd edib ki, İsrail ordusu əməliyyat zamanı Livanın şərqindəki Bekaa vadisində yerləşən komanda məntəqələri də daxil olmaqla Hizbullahın 80-dən çox hədəfini vurub.
Netanyahu həmçinin bildirib ki, Hizbullahın bu hücumu atəşkəs rejiminin kobud şəkildə pozulmasıdır və buna görə də İsrail ordusuna təşkilata qarşı güclü zərbə endirmək göstərişi verib.
Xatırladaq ki, bu həftənin əvvəlində ABŞ və İran Livan da daxil olmaqla bütün cəbhələrdə hərbi əməliyyatların dərhal dayandırılmasına çağıran memorandum imzalayıblar. İsrail isə həmin danışıqlarda iştirak etməyib.
