Avropa İnsan Hüquqları Məhkəməsi (AİHM) Ukrayna vətəndaşı Sergiy Mykolayovych Rybiynin beş il müddətinə məhkəmə qarşısında tərəfləri təmsil etməsini və ya onlara hüquqi yardım göstərməsini qadağan edən qərar qəbul edib.
Gununsesi.info xəbər verir ki, məhkəmə tərəfindən yayımlanan “Ukrainian representative barred from assisting parties before the Court for a period of five years.pdf” sənədinə əsasən, bu addım Məhkəmə Qaydalarının 44D § 2-ci maddəsinə uyğun olaraq atılıb. Qərar Palatanın təklifi əsasında, cənab Rybiy və Ukrayna Hökumətinin şərhləri alındıqdan sonra, 17 sentyabr 2026-cı il tarixində Məhkəmə Sədri tərəfindən təsdiqlənib.
S.M. Rybiy hüquq dərəcəsinə malik olsa da, rəsmi olaraq Vəkillər Kollegiyasının üzvü olmadığı üçün Ukrayna Milli Vəkillər Kollegiyasının rəyinin alınmasına ehtiyac duyulmayıb. Məhkəmənin kənarlaşdırma qərarı onun məhkəmə icraatlarında nümayiş etdirdiyi uzunmüddətli və sistemli davranış modeli ilə əlaqələndirilir. Qeyd edək ki, o, indiyədək Məhkəmədə icraatda olan və ya olmuş 600-dən çox işdə ərizəçilərə yardım göstərib.
AİHM-in qərarına əsasən, S.M. Rybiy tərəfindən təmsil olunan ərizəçilər üçün yeni qaydalar müəyyənləşib:
Şikayətləri hələ Ukrayna Hökumətinə göndərilməyən ərizəçilər ehtiyac yarandığı təqdirdə indi və ya icraatın sonrakı mərhələlərində özlərinə yeni nümayəndə təyin edə bilərlər.
Şikayətləri artıq Ukrayna Hökumətinə təqdim edilmiş və Hökumətin rəyi tələb olunan işlərdə isə ərizəçilərdən mütləq şəkildə başqa bir nümayəndə təyin etmələri xahiş olunur.
Həmin Qaydaların 44D 2-ci paraqrafına əsasən, Avropa İnsan Hüquqları Məhkəməsinin Sədri müstəsna hallarda və Palatanın təklifi əsasında hər hansı bir nümayəndəni Məhkəmə proseslərindəki uzunmüddətli, sistemli pozuntulara yol verən və ya uyğunsuz davranışlarına görə tərəfləri təmsil etməkdən və ya onlara hüquqi yardım göstərməkdən kənarlaşdırmaq hüququna malikdir.
Bu qaydaya görə qərar qəbul edilməzdən əvvəl məsələnin obyektivliyini təmin etmək üçün həmin şəxsin, eləcə də müvafiq Hökumətin və (zərurət yaranarsa) Milli Vəkillər Kollegiyasının şərhləri alınmalıdır.
Məhz bu məcburi prosedur çərçivəsində, S.M. Rybiy və Ukrayna Hökuməti dinlənildikdən sonra onun Məhkəmə qarşısındakı sistemli davranış modelinə görə 5 illik kənarlaşdırma qərarı tətbiq edilib.
