“Misli”dən Azərbaycan voleyboluna böyük dəstək – AVF ilə müqavilə imzalanıb - VİDEO - FOTO

Azərbaycan Voleybol Federasiyası (AVF) ilə “Azərlotereya” ASC-nin “Misli” brendi arasında əməkdaşlıq müqaviləsinin imzalanma mərasimi keçirilib.

Gununsesi.info AZƏRTAC – a istinadən xəbər verir ki, tərəflər arasında müqavilə rəsmilərin iştirakı ilə keçirilən tədbirdə imzalanıb. Mərasimdə AVF-nin prezidenti Şahin Bağırov, “Demirören Holding”in İdarə Heyətinin sədri Yıldırım Demirören, AVF, “Azərlotereya” ASC və voleybol klublarının rəsmiləri iştirak ediblər.

AVF-nin prezidenti Şahin Bağırov Azərbaycan voleybolunun hər zaman ölkəmiz üçün qürur mənbəyi olduğunu və “Misli” kimi güvənli tərəfdaşla əməkdaşlığın voleybolumuzun inkişafına mühüm töhfə verəcəyini vurğulayıb.

“Demirören Holding”in İdarə Heyətinin sədri Yıldırım Demirören çıxış edərək voleybol idmanının ölkədəki mövqeyini və idmançılarımızın beynəlxalq arenalarda qazandıqları uğurları yüksək qiymətləndirib. O, əməkdaşlığı Azərbaycan voleybolunun inkişafında yeni bir mərhələnin başlanğıcı olaraq dəyərləndirib.

Sonda tərəflər arasında əməkdaşlıq müqaviləsi imzalanıb. Müqaviləni AVF-nin İctimai Birliyinin vitse-prezidenti Bəhruz Quliyev və “Azərlotereya” ASC-nin İdarə Heyətinin sədri Osman Karakuş imzalayıblar.

Mərasim iştirakçıları bu əməkdaşlığın hər iki tərəf üçün də uğurlu olmasını və voleybolçularımıza gələcək oyunlarda böyük nailiyyətlər diləyiblər.