Rusiyada Dövlət Dumasına seçkilər keçiriləcək. Rusiya vətəndaşlarının xaricdə səs verməsi üçün 152 ölkədə yüzlərlə seçki məntəqəsi yaradılıb.
Gununsesi.info xəbər verir ki, Rusiya Mərkəzi Seçki Komissiyasının məlumatına görə, xaricdə yaşayan və ya müvəqqəti səfərdə olan Rusiya vətəndaşlarının səs verməsi üçün müxtəlif ölkələrdə seçki məntəqələri fəaliyyət göstərəcək.
Yaxın xaric ölkələri arasında Azərbaycanda 1, Ermənistanda isə 2 seçki məntəqəsi yaradılıb. Azərbaycandakı əsas seçki məntəqəsi Bakıda, Rusiya səfirliyinin Konsulluq şöbəsində yerləşir. Məntəqəyə 8017 nömrəsi verilib.
Bundan başqa, Azərbaycan ərazisində yaşayan Rusiya vətəndaşları üçün Gəncədə də erkən səsvermə imkanı yaradılıb. Lakin əsas səsvermə sentyabrın 20-də Bakıda keçiriləcək. Ermənistanda isə səsvermə Rusiya səfirliyində və Gümrüdəki Baş Konsulluqda olmaqla iki məntəqədə təşkil ediləcək.
Gürcüstan və Ukraynada isə seçki məntəqələri yaradılmayıb. Gürcüstanla Rusiya arasında hazırda diplomatik münasibətlərin olmaması da bu vəziyyətlə bağlı qeyd edilən səbəblərdəndir. Rusiyada Dövlət Dumasına seçkilər 18–20 sentyabr tarixlərində keçiriləcək. Xaricdə səsvermənin təşkili ilə bağlı Rusiya rəsmiləri 152 ölkədə yüzlərlə məntəqənin yaradıldığını bildiriblər.
