İctimai yerlərdə mobil telefon və digər texniki vasitələrlə videoçəkiliş aparılması geniş yayılsa da, bu hüququn sərhədləri ilə bağlı suallar hələ də aktuallığını qoruyur.
Mövzu ilə bağlı Gununsesi.info -ya açıqlama verən hüquqşünas Şamil Paşayev bildirib ki, ictimai yerdə olmaq hər bir şəxsin görüntüsünün istənilən məqsədlə çəkilməsi və yayılması anlamına gəlmir.
Onun sözlərinə görə, parklar, küçələr, meydanlar və digər ictimai məkanlarda ümumi mənzərənin çəkilməsi, bir qayda olaraq, qanunla qadağan edilmir. Lakin konkret şəxsin məqsədli şəkildə çəkilməsi, həmin görüntülərin onun razılığı olmadan sosial şəbəkələrdə paylaşılması və ya kommersiya məqsədilə istifadə edilməsi şəxsi həyatın toxunulmazlığı və şəxsi məlumatların qorunması ilə bağlı hüquqi məsələlər yarada bilər.
Şamil Paşayev qeyd edib ki, xüsusilə azyaşlıların, xəstələrin və ya şəxsi vəziyyəti həssas olan insanların görüntülərinin onların və ya qanuni nümayəndələrinin razılığı olmadan yayılması qanunvericiliyin tələblərinə zidd hesab oluna bilər.
Hüquqşünas əlavə edib ki, bəzi dövlət obyektlərində, strateji əhəmiyyətli müəssisələrdə, məhkəmələrdə və xüsusi mühafizə olunan ərazilərdə videoçəkilişlə bağlı əlavə məhdudiyyətlər mövcuddur və həmin qaydalara əməl olunmalıdır.
Onun sözlərinə görə, jurnalist fəaliyyəti, ictimai maraq və hüquq-mühafizə orqanlarının fəaliyyəti ilə bağlı bəzi istisnalar olsa da, hər bir halda şəxslərin hüquq və azadlıqlarının balansı qorunmalıdır.
Bir sözlə, ictimai yerdə videoçəkiliş aparmaq ümumilikdə mümkün olsa da, bu hüquq qeyri-məhdud deyil və digər şəxslərin qanunla qorunan hüquqlarını pozmamalıdır.
Elmar
